Район малсылары Башҡортостанда һөт етештереү, шулай уҡ йылына бер һыйырҙан һөт һауыу күләме буйынса ла алдынғылыҡты бирмәй.

Былтырғы йомғаҡтарға ҡарағанда, район буйынса тулайым һауым 40 355 тоннанан ашыу тәшкил итә, малсылар 40 151 тонна продукция һатҡан, тип хәбәр итә республиканың Ауыл хужалығы министрлығы. Йылына уртаса алғанда бер һыйырҙан бында 5 600 килограмға яҡын һөт һауылған. Был — тармаҡтағы иң яҡшы күрһәткес.
Саҡмағош, Дүртөйлө һәм Тәтешле райондарында һөт һауыу буйынса 5 меңлек сик үтелгән. Ауырғазы, Көйөргәҙе, Мәләүез, Мәсетле, Стәрлетамаҡ, Өфө һәм Учалы райондары һауынсылары 4 меңлек кимәлде уҙған.
Яңы йылдың тәүге көндәрендә шул уҡ саҡмағоштар иң яҡшы күрһәткестәргә өлгәшә. Район хужалыҡтарында һәр һыйырҙан тәүлегенә уртаса һауым — 14,3, Өфө районында — 11,2, Дүртөйлөлә 11,3 килограмм тәшкил иткән.