Башҡортостандың Хеҙмәт һәм халыҡты социаль яҡлау министрлығынан хәбәр итеүҙәренсә, Рәсәй Хөкүмәтенең “2012 йылда ял көндәрен күсереү тураһында”ғы ҡарарына ярашлы, ял һәм байрам көндәрен һөҙөмтәле файҙаланыу маҡсатында шәмбе — 29 декабрҙәге ял көнө дүшәмбе — 31 декабргә күсерелә.

Рәсәй Хеҙмәт кодексының 112-се статьяһына ярашлы 1, 2, 3, 4, 5, 6 һәм 8 ғинуарҙағы Яңы йыл каникулы, 7 ғинуарҙағы Раштыуа байрамы — ял көндәре. Ял һәм байрам көнө тап килгән осраҡта, ял көнө байрамдан һуң килгән эш көнөнә күсерелә.
2013 йылда 5 һәм 6 ғинуарҙағы байрам көндәре шәмбе һәм йәкшәмбегә тура килә. Шуға күрә шәмбе — 5 ғинуарҙағы ял көнө кесе йома — 2 майға, йәкшәмбе — 6 ғинуарҙағы ял көнө йома — 3 майға күсерелә. Шулай итеп биш көнлөк эш аҙнаһында 2012 йылдың 30, 31 декабре, 2013 йылдың 1, 2, 3, 4, 5, 6, 7, 8 ғинуары Башҡортостанда — ял көндәре. Шәмбе — 29 декабрҙәге эш оҙайлылығы 1 сәғәткә ҡыҫҡара.
Йыллыҡ төп йәки өҫтәмә түләүле отпуск бирелгәндә был көндәр отпуск иҫәбенә индерелмәй.