Ауыл ерендә социаль-иҡтисади хәл ифрат ҡатмарлы заманда Күгәрсен районы тотороҡло эшләп килгән крәҫтиән (фермер) хужалыҡтары, эшҡыуарҙары, шәхси ярҙамсы хужалыҡтары менән бер башҡа айырылып тора тиһәк, һис тә хата булмаҫ. Төрлө өлкәлә уңышлы эшмәкәрлек алып барған “Энергия” ябыҡ акционерҙар йәмғиәте, “Электро+” яуаплылығы сикләнгән йәмғиәте, “Ергән” МТС-ының “Исем” бүлексәһе, “Ҡырағай ҡорт балы” яуаплылығы сикләнгән йәмғиәте, “Николаев” шәхси предприятиеһы, Альбина Вәлиеваның крәҫтиән (фермер) хужалығы, Ләлә Фәтҡуллинаның крәҫтиән хужалығы һәм башҡалар күтәрә төбәктең бәҫен. Халыҡты эш менән тәьмин итеүҙә, һәр төрлө хәйриә сараларында иң әүҙем ҡатнашҡан ойошмаларҙан һанала улар.

Быйыл яҙ Мәҡсүт ауылындағы ике ҡатлы биш йорттоң ташландыҡ хәлдә булыуы тураһында яҙып сыҡҡайныҡ инде. Әле уларҙы танырлыҡ та түгел: заманса өйҙәр йәм-йәшел тимер менән ябылған ҡыйыҡтары, штукатурланып, йәшкелт төҫкә буялған стеналары әллә ҡайҙан кешенең иғтибарын йәлеп итеп тора. Элекке тишек-тошоҡ нигеҙҙәр таш менән көпләнеп, ғүмергә етерлек итеп нығытылған, подъезд ишектәре алмаштырылған, быға тиклем һарҡып ингән ямғыр, ҡар һыуынан һарғайған йәки ҡарайған түбәләр, стеналар ағартылған, буялған, иҙәндәр ҡайтанан тигеҙләнгән. Әммә халыҡ өсөн иң һөйөнөслөһө — һәр фатирға һыу, канализация үткәрелеүе.
— Район хакимиәте башлығы Фәрит Мусинға ифрат рәхмәтлебеҙ, — тип башланы һүҙен ошонда йәшәгән Римма Абзалова. — Башҡа берәү булһа, Президент килгәс, уға эштәр яҡшы барған, хәл-торош әҙәмсә булған урынды күрһәтер ине, ә ул, Рөстәм Хәмитов урындағы “Октябрьский” яуаплылығы сикләнгән йәмғиәтенең эшмәкәрлеге менән танышырға теләгәндә ошо йорттарыбыҙға иғтибар йүнәлтеп, район көсө менән генә хәл итә алмаҫтай мәсьәләләрҙе асып һалды. Һөҙөмтәлә, ике ай ҙа үтмәне, Президенттың ярҙамы, район етәксеһенең тырышлығы менән өйҙәребеҙ бөтөнләй икенсе сүрәткә инде. Әлбиттә, ремонт эштәрен башҡарған барлыҡ төҙөүселәргә лә рәхмәтебеҙ сикһеҙ.
Йорттарҙы үҙгәртеп ҡороуҙы “Энергия” ябыҡ акционерҙар йәмғиәте (етәксеһе — Мансур Әбсәләмов) үҙ өҫтөнә ала. Ойошманың участка начальнигы Илдус Нурғәлиев ике ай буйы ремонт барған объекттан сыҡмай — тиҙ арала теүәлләнгән реконструкция уның эшселәрҙе ойоштора, туплай белеү һәләтенә лә бәйле.
— Үҙебеҙҙең “Энергия” йәмғиәте хеҙмәткәрҙәре, шулай уҡ Мәҡсүттән йәлеп ителгән эшселәр ҙә ҙур тырышлыҡ һалды, сөнки ҡар яуғансы барлыҡ эште лә тамамларға тейеш инек. Үҙ бурысыбыҙҙы теүәл башҡарҙыҡ, — тип ҡыуанысы менән уртаҡлаша урта звено етәксеһе. — Йомағужанан килгән “Водоканал” ойошмаһы эшселәренең дә тырышлығын билдәләп үтергә кәрәк: фатирҙарға һыу, үҙәкләштерелгән канализация үткәреүҙе ҡыҫҡа ғына ваҡыт эсендә атҡарып та ҡуйҙылар. Ошо арала йорт биләмәләрен ҡойолған металл профиле менән кәртәләп ҡуясаҡбыҙ. Тиҙҙән был төбәк балҡып торасаҡ.