Бөгөн Өфөлә “Социология һәм йәмғиәт: глобаль талаптар һәм төбәктәр үҫеше” тип аталған сираттағы IV Бөтә Рәсәй конгресының икенсе этабы асыла. Фәнни сараны Рәсәй социологтар йәмғиәте ойоштора. Конгресс эшендә Европа һәм халыҡ-ара социологик ассоциация вәкилдәре, Белоруссия, Украина, Ҡаҙағстан, Ҡырғыҙстан, Вьетнам, Һиндостан, Бразилия, Төркиә, Сербия, Польша, Чехия һәм башҡа ил ғалимдары ҡатнаша.

Рәсәй социологтары йәмғиәте президенты Валерий Мансуров әйтеүенсә, ҙур сара ғәҙәттәгесә баш ҡалала түгел, ә Рәсәй төбәктәренең береһендә уҙғарылыуы менән үҙенсәлекле.
Республикабыҙҙың Фәндәр академияһы, Социаль-сәйәси һәм хоҡуҡи тикшеренеүҙәр институты, Рәсәй Фәндәр академияһының Социология институтының Башҡортостан филиалы мөһим йыйынды ойоштороуҙа әүҙемлек һәм тырышлыҡ күрһәтеп, уның уңышлы үтеүе өсөн бөтә көсөн һаласаҡ. Конгресс барышында төрлө ойошмаларҙағы 18 фекер алышыу майҙансығында сессиялар, секциялар һәм “түңәрәк өҫтәл”дәр эшләйәсәк.


Рим ВӘЛИӘХМӘТОВ, Башҡортостан Фәндәр академияһының Социаль-сәйәси һәм хоҡуҡи тикшеренеүҙәр институты директоры:
— IV Бөтә Рәсәй социологик конгрестың Өфөләге икенсе этабы ҡыҙыҡлы, фәһемле булмаҡсы. Рәсәйҙәге һәм бөтә донъялағы глобаль, дөйөм милли процестар һәм ҡатмарлы мәсьәләләр бер бөтөн итеп түгел, ә төбәк үлсәмдәренән, үҙенсәлектәренән сығып ҡараласаҡ. Ил төбәктәренең социаль-иҡтисади, сәйәси һәм этномәҙәниәт үҫеше үҙенсәлектәре мотлаҡ иҫәпкә алынасаҡ. Яңы сәйәси шарттарҙа, иҡтисадта ғына түгел, ә халыҡтың йәшәйеше өсөн үтә ҙур әһәмиәткә эйә һаулыҡ һаҡлау, мәғариф, мәшғүллек, гражданлыҡ әүҙемлеге кеүек өлкәләр тәрән үҙгәрештәр кисергән осорҙа төбәктәр нисек үҫешәсәк? Рәсәйҙең демографияһы, киләсәге ниндәй хәлдә? Ошондай мөһим мәсьәләләргә форумда төрлө яҡлап анализ яһаласаҡ, төплө, ҡыҙыҡлы сығыштар, фекерҙәр яңғыраясаҡ, тип уйлайым, сөнки конгресс эшендә илебеҙҙәге билдәле социологтар менән бер рәттән, башҡа фән вәкилдәре — демограф, иҡтисадсы, сәйәсмән һәм социаль философтар ҙа ҡатнаша.
Ғәмәлдә Өфөләге оло йыйын социаль фәндәр вәкилдәренең халыҡ-ара форумына әүерелде, тип әйтергә мөмкин. Сит илдәрҙән генә лә 37 ғалимдың, Мәскәү, Санкт-Петербург ҡалаларынан һәм илдең башҡа төбәктәренән 500-ҙән ашыу фән һәм мәғариф әһеле ҡатнашыуы көтөлә.
Ошоғаса конгрестың Санкт-Петербург һәм Мәскәү кеүек ҙур ҡалаларҙа үткәрелеүенә күнегеп бөткәйнек. Был юлы уның республикабыҙҙың баш ҡалаһында ойошторолоуы беҙҙең өсөн ғорурлыҡ ҡына түгел, ә оло яуаплылыҡ та икәнен йәшермәйбеҙ. Йыйын үҙ эшен Рәсәй төбәктәрен яңыртыу мәсьәләләренә арналған ғилми-ғәмәли конференция үткәреүҙән башлаясаҡ. Юғары уҡыу йорттары, ғилми-тикшеренеү институттары һәм үҙәктәре лә был көндәрҙә фекер алышыуҙарҙан, сессияларҙан гөрләп торасаҡ.