Өс бала әсәһе, Хөсәйен Әхмәтов исемендәге Башҡорт дәүләт филармонияһы артисы Лилиә Ишемйәрованың, ғаиләһенән тыш, ижадҡа ла ваҡыты ҡала башлаған.
— Дүрт йәшлек Арыҫланбай менән өс йәшлек Ишморат улдарыбыҙҙы ошо айҙа балалар баҡсаһына бирҙек. Шуға күрә тыныс күңел менән ижадҡа сумдым, — ти йырсы.
Ысынлап та, сәхнә оҫтаһының тормошонда илһамлы осор башланған. Ул бөгөн клиптарҙан ғына торған DVD-диск әҙерләргә тотонған. Тағы ла филармонияның ижад миҙгеле асылыуына ҡарата яңы йырҙар яҙҙыра һәм сит телдә йыр өйрәнә икән.
— Был йыр сит ил киноларының береһенән алынған. Исеме әлегә сер булып ҡалһын. Уны ноябрҙә буласаҡ “Синема! Синема!” тигән концертта ишетергә мөмкин, — тип серле йылмайҙы йырсы.
Әйткәндәй, Башҡортостандың атҡаҙанған артистары Урал Мортазин менән Лилиә Ишемйәрованың талантлы ғаиләһендә тағы ла Зөлхизә исемле һылыуҡай буй еткерә. Ул быйыл IX класҡа барған, тик “бишле”гә уҡый.