Башҡортостанда "Европа – Көнбайыш Ҡытай" халыҡ-ара транспорт юлы сиктәрендә "Баулы – Күмертау" юл участкаһын төҙөү башланды. Беҙҙең республикала юлдың оҙонлоғо 265 километр тәшкил итә. Ул Йәрмәкәй, Бәләбәй, Әлшәй, Бишбүләк, Миәкә, Стәрлебаш, Федоровка, Мәләүез һәм Көйөргәҙе райондары аша үтәсәк һәм федераль әһәмиәттәге "Өфө – Ырымбур" трассаһы менән тоташасаҡ.
Юл төҙөлөшөн башлау тантанаһында Башҡортостан Республикаһы Хөкүмәте Премьер-министрының беренсе урынбаҫары Рәүеф Ноғоманов, "Рәсәй автомобиль юлдары" дәүләт компанияһы идаралығы рәйесе Сергей Кельбах ҡатнашты.
– Йәрмәкәй районында мөһим объектты асыуға старт бирәбеҙ. Ул стратегик әһәмиәткә эйә. Шәхси инвестиция һалынған был юл — республикала тәүгеһе, – тине вице-премьер Рәүеф Ноғоманов.
– Автомагистралдең нәҡ Башҡортостан аша үтеүенә ҡыуанам, әлбиттә, бында Президент Рөстәм Хәмитовтың өлөшө ҙур, – тине Сергей Кельбах. – Юл, ҡалалар һәм ауылдар араһында бәйләнеште тағы ла киңәйтеп, төбәк-ара автомобиль ташыуҙарын әүҙемләштерәсәк. Бынан тыш, күп кенә эш урындары буласаҡ.
Башҡортостан аша үткән юл киләсәктә төбәктең инфраструктураһын үҫтереүгә булышлыҡ итәсәк, яҡындағы биләмәләргә инвестиция һалыуға ла ҡыҙыҡһыныу артасаҡ.