Ғилемдар РАМАЗАНОВ

Сағыла сағыу ҡояшта
Ҡырҙар, йылға үҙәне,
Ерҙе гөлгә күмеп атлай
Июль — йәйҙең үҙәге.

Июль — тимәк, болондарҙа
Йылтыр салғылар сыңы.
Ҡайҙа барма — йәйҙең йәме,
Хеҙмәттең дәртле моңо.

Июль — ҡырҙа игендәрҙең
Өлгөрөп бешкән мәле,
Игенсенең, ҡанатланып,
Ураҡҡа төшкән мәле.

Комбайн иңләй баҫыуҙы,
Гөр килеп тора туғай,
Тракторҙар йырлағанға
Ҡыуана һабантурғай...