Башҡортостан Башлығы бының мөһимлеген аңлатып, республика халҡынан быны тейешенсә ҡабул итеүҙәрен һораны.

Башҡортостан Республикаһы Башлығы Радий Хәбиров Тура бәйләнеш барышында социаль селтәрҙән «Пилотһыҙ хәүеф» режимы ваҡытында мобиль интернетты һүндереүҙең сәбәптәре тураһында һорауға яуап бирҙе.

«Пилотһыҙ осоу аппараты хәүеф янағанда Оборона министрлығы һәм Федераль именлек хеҙмәте идаралығы билдәләгән режимда ҡаралған бөтә кәрәкле саралар ҙа ҡабыҙыла. Һүндереү – ул тормошобоҙҙоң бер өлөшө, уны аңлап ҡабул итергә кәрәк», – тине Башҡортостан Башлығы.

Радий Хәбиров сикләүҙәрҙең төрлө типтағы дрондарға ҡаршы тороу кәрәклеге менән бәйле булыуын һыҙыҡ өҫтөнә алды, улар араһында билдәле моделдәр ҙә, шулай уҡ яңы аппараттар ҙа осрай.

«Беҙ идара итеүҙең төрлө формаларын, һөжүм итеүҙең бөтөнләй икенсе тактикаһын күрәбеҙ. Улар беҙҙең вышкаларҙың ҡайҙа тороуын, зенит-ракета ҡоролмаларының позицияларын һәм башҡаларҙы бик яҡшы күрә. Быларҙың барыһы ла күренә», – тине ул.

Йәшәү өсөн мөһим йүнәлештәр буйынса бәйләнеште һаҡлау өсөн «аҡ исемлектәр» төҙөү буйынса эш алып барыла, әммә әлегә сикләүҙәрҙән тулыһынса ҡотолоу мөмкин түгел, тип билдәләне республика етәксеһе.