Республика ноябрҙә Стәрлетамаҡты урау юлы асыла

Башҡортостан Башлығы Радий Хәбиров 2 ноябрҙә хөкүмәттең оператив кәңәшмәһендә транспорт һәм юл хужалығы министры Любовь Минакованан Стәрлетамаҡты урау юлын ҡасан асыуҙарын һораны.

«18-20 ноябрҙә «Транспорт аҙналығы» барышында асырға тәҡдим иттеләр. Унда барыһы ла әҙер», — тип яуап бирҙе ул.

Бынан алдараҡ Башинформ Р-240 Өфө — Стәрлетамаҡ трассаһында федераль юлдың 23 километрын төҙөкләндереүҙәрен хәбәр иткәйне. Хәҙер ике юл һыҙаты урынына дүрт һыҙат. Нормативтар буйынса бындай төҙөлөшкә 36 ай бирелә, әммә эштәр бер йылда башҡарылды. Сөнки контракт 2025 йылдың мартында төҙөлһә лә, финанслау һуңыраҡ килде.