Башҡортостанда яғыулыҡ баҙарында хәл яҡшыра бара, тип билдәләне сәнәғәт, энергетика һәм инновациялар министры урынбаҫары Эдуард Мостафин Республикаға идара итеү үҙәгендә үткән брифингта. Бөгөн иртән 10 муниципалитетта яғыулыҡ менән тәьмин итеүҙә өҙөклөктәр теркәлде, шул яҡтарға бензин ебәрелде.

Мәҫәлән, тәүҙә Өфө өсөн тәғәйенләнгән бензин Стәрлетамаҡҡа оҙатылды. Хәлде координациялау өсөн ҡалаға оперштаб ағзаһы килде, ул хакимиәт вәкилдәре менән бергә 34 АЗС-ты тикшереп сыҡты. Заправкала 50-60 машина сират көтә.

Приют ҡасабаһында (унда йәшәүселәр ҙә яғыулыҡ булмауға зарланған) көндөҙ АЗС-та 20-гә яҡын автомобиль тора ине. Заправкаларҙың береһендә яғыулыҡтың бөтә төрҙәре лә бар, Комсомол урамындағы АЗС резервуарҙарҙы йыуыу өсөн бер аҙнаға ябылған, береһендә дизель генә ҡалған. Бәләбәй районында бөтәһе 9 АЗС эшләй.