Рәсәй Президенты бер нисә яҡташыбыҙҙы орден-миҙалдар менән бүләкләү, шулай уҡ маҡтаулы исемдәр биреү тураһында указға ҡул ҡуйҙы. Рәсми документ «Башинформ» ҡарамағында бар.

Ғаилә институтын нығытыуҙа һәм балалар тәрбиәләүҙә ҙур ҡаҙаныштары өсөн Елена һәм Николай Матвеевтар «Ата-әсәлек даны» орденына лайыҡ булды.

Өфө фән һәм технологиялар университетының факультет деканы Гөлфирә Абдуллина һәм Өфө фән һәм технологиялар университетының физика-техника институты кафедраһы мөдире Рим Вәлиуллин юғары квалификациялы белгестәр әҙерләүҙәге, ғилми-педагогик эшмәкәрлектәге ҡаҙаныштары һәм күп йыллыҡ намыҫлы эше өсөн II «Ватан алдындағы хеҙмәттәре өсөн» ордены миҙалын алды.

Республиканың Рус драма театры артисы Ирина Агашкова-Кореневаға – Рәсәйҙең атҡаҙанған артисы, Өфө сәнғәт училищеһы уҡытыусыһы Нәйлә Йосопова һәм Рус драма театрының художество етәксеһе Елена Кондоянидиға Рәсәйҙең атҡаҙанған мәҙәниәт хеҙмәткәре тигән маҡтаулы исем бирелде.