Һыу буйында уйнап ҡал
Тән тиреһе ҡояшҡа тигеҙ янһын, матур төҫкә инһен өсөн ҡомда ятып түгел, күберәк хәрәкәт итеп ҡыҙынырға кәрәк. Пляж волейболы уйнаусыларҙы күрһәгеҙ, уларға ҡушылығыҙ. Балаларығыҙ менән шыма таштар табып, һыу өҫтөнән һикертегеҙ йәки башҡа мауыҡтырғыс шөғөл табығыҙ. Уйын яңы дуҫтар табырға, яҡындарыңдың күңел кисерешен асыҡларға форсат бирә. "Ҡомда һәм ҡырсында яланаяҡ йөрөү табанға массаж яһауға тиң", — ти Наталья Фёдоровна.
Урманда нисек күңел асырға?
Тәбиғәт ҡосағына килгәс, ашап-эсеп кенә ултырмағыҙ. Тәүҙә эргә-тирәгеҙҙе сүп-сарҙан таҙартығыҙ: тәбиғәткә лә файҙа булыр, быуындарығыҙҙы ла яҙылдырырһығыҙ.
Ҡаҙанда аш бешкән арала аппетитты асыр өсөн мауыҡтырғыс уйындар ойошторорға мөмкин.
"Һыу ташыу"Уйында бер нисә кеше ҡатнаша. Һәр ҡайһыһына ҙур булмаған бер иш һауыт бирелә. Алыҫыраҡ ергә биҙрәләр ултыртыла һәм дәртле көй ҡуйыла. Йыр-моң тынғас, уйын туҡтатыла. Иң күп һыу йыйыусы еңеүсе була.
"Кәпәс сисеү"
Был уйынға буй оҙонлоҡтарының айырмаһы биш сантиметрҙан ашмаған ике кеше саҡырыла. Улар бер-береһенең баш кейемен сисергә тейеш. Кем дәғүәсеһенең кәпәсен һалдыра — шул еңеүсе.
Уйын ҡағиҙәләре ябай:
— баш кейемен төҙәтеп алырға, дәғүәсенән ҡасҡанда төрлө яҡҡа тайпылырға, уны алдаштырырға, ҡулдарын ситкә этергә мөмкин;
— һыҙылған сик аша сығырға, башыңдағы кәпәсте тотһалар, бирмәйем тип тартҡылашырға, дәғүәсеңде этеп ҡолатырға, уға аяҡ салырға, һуғырға, кейеменән тартырға ярамай;
— кешенең кәпәсенә һонолған ҡул хәүефле, сөнки бармаҡтарҙың яңылыш күҙҙе йәрәхәтләүе ихтимал. Шуға күрә кәпәскә үрелгән саҡта бармаҡтарҙы үҙеңә ҡаратырға кәрәк.
"Ат сабышы"Ярышыусылар тубығы менән тупты ҡыҫып, ҡулдарындағы "сыбыртҡы" менән уға һуға-һуға билдәләнгән ағасты урай. Кем беренсе булып кире элекке урынына барып етә, шул еңеүсе.
"Ҡалҡан"
Ике кешегә ике яҡтан да тотҡаһы булған ҡалҡан бирәләр. Улар бер-береһен этеп ҡолатырға түгел, ә һыҙыҡтан ситкә сығарырға тейеш. Уйын аяҡ, ҡул мускулдарын нығытырға ярҙам итә.