Башҡортостан яугире отпускыһы ваҡытында ғаилә ҡорған
Баҡалы районында МХО яугире Сергей Аҡбулатов кәләш алған. Район башлығы Олег Ефимов никах теркәү тантанаһында йәштәргә үҙенең изге теләктәрен еткерҙе.
«Унда, алғы һыҙыҡта, ул һөйгән ҡыҙы менән осрашыуҙы көтә ине. Ҡыҫҡа ваҡытлы ялға ҡайтҡанында Сергей менән Диана сәстәрен сәскә бәйләне. Был бик тулҡынландырғыс һәм иҫтәлекле мәл. Тыуған илде һаҡлаусылар өсөн ғаилә – ышаныслы тыл, таяныс һәм тыуған яҡҡа тартып торған көс ул», – тине Олег Ефимов.
Сергей Аҡбулатов «Башҡортостан» полкының Сергей Зорин исемендәге танк батальоны составында өс йылдан ашыу махсус хәрби операция биләмәһендә хеҙмәт итә. Уҙған йылдың ноябрендә ул алғы һыҙыҡта күрһәткән батырлығы өсөн дәүләт наградаһына тәҡдим ителгән. Яҡташыбыҙ иптәштәрен һәм техниканы ВСУ дроны һөжүменән һуң янып киткән урмандан алып сыҡҡан.