Ишембай районында яңы фельдшер-акушерлыҡ пункты асылды
Учреждение Ҡарайған ауылында төҙөлдө, шулай уҡ ике күрше ауыл халҡы дауалана.
Ҡарайған ауылында модулле фельдшер-акушерлыҡ пункты асылды. Был хаҡта Ишембай районы хакимиәте башлығы Азат Ишемғолов хәбәр итте. «Яңы бинала бөтә шарттар булдырылған. Бында тәжрибәле фельдшер Флүзә Сөнәғәтулла ҡыҙы Хәкимова эшләй», — тип билдәләне етәксе.
Уның һүҙҙәренсә, 2024 йылда ғына Ишембай районының Үрге Этҡол, Маҡар һәм Ҡолғона ауылдарында – яңы табип амбулаториялары, Сәлихтә ФАП асылды. Көҙгә Яңы Әптектә тағы ла бер амбулатория асыу планлаштырыла. Киләһе йылда райондың биш ауылында фельдшер-акушерлыҡ пункттары үҙ ишектәрен асырға тейеш.
Хәтерегеҙгә төшөрәбеҙ, 2025 йылда «Башҡортостан Республикаһында һаулыҡ һаҡлауҙың беренсел звеноһын яңыртыу» төбәк программаһын тормошҡа ашырыу сиктәрендә республикала 134 модулле ФАП һәм амбулатория ҡуйыла, алты поликлиника төҙөлә, туғыҙ дауахана ремонтлана, 4,5 меңдән ашыу медицина аппараты һәм 99 автомобиль һатып алына.
