Башҡортостанда матур датала 245 никах теркәлгән
Матур датала — 2025 йылдың 25 июнендә — Башҡортостан ЗАГС бүлектәрендә 245 никах теркәү тантанаһы уҙған.
Республиканың Юстиция эштәре буйынса дәүләт комитетынан хәбәр итеүҙәренсә, был көндө никахтарҙың күбеһе Өфөлә теркәлгән: 15-е — Киров районының ЗАГС бүлегендә, 9-ҙы — Совет районының ЗАГС бүлегендә, 7-һе — Калинин районының ЗАГС бүлегендә. Республика буйынса беренсе урында Октябрьский ҡалаһы, унда 17 пар өйләнешкән, икенсе урында Нефтекама – 15 пар, өсөнсөлә иһә Стәрлетамаҡ – 12 пар.
«Ошо матур датала ғаилә ҡорған йәштәр оҙаҡ йылдар бәхетле ғүмер итһен! Уларға ныҡлы һаулыҡ, мөхәббәт, сабыйҙары тыуыуын, именлек теләйем!» — тип яҙа Башҡортостан хөкүмәте вице-премьеры Ирек Сәғитов үҙенең телеграм-каналында.