Был аҙнала Өфөлә кардиология үҙәгенең яңы хирургия корпусы асыла
Был аҙнала Өфөлә республика кардиология үҙәгенең яңы хирургия корпусын асыу планлаштырыла, тип хәбәр итте Башҡортостан Башлығы Радий Хәбиров хөкүмәттең оператив кәңәшмәһендә.
«Башинформ» хәбәр иткәнсә, дөйөм майҙаны яҡынса 32 мең квадрат метрлыҡ туғыҙ ҡатлы бина 2019 йылдың июлендә төҙөлә башлағайны. Бында диагностика кабинеттары менән ҡабул итеү бүлеге, поликлиника, реанимация менән 10 операция блогы, рентгенохирургия һәм кардиохирургия бүлексәләре, стерилизация комплексы, административ блок һәм дарыухана-бүлеү пункты урынлашҡан.
Объекттың хаҡы 10,7 миллиард һум тәшкил иткән, аҡса Башҡортостан бюджетынан бүленгән.
«Был минең өсөн иң ҙур һәм әһәмиәтле объект булып тора. Республикала йәшәүселәр, бер ҡайҙа ла китмәйенсә, ошонда кардиоярҙам алырға тейеш», — тип билдәләне республика етәксеһе.