Башҡортостан Башлығы һәләк булған яугирҙәрҙең тол ҡатындары һәм әсәләренең мөрәжәғәттәрен ҡарарға ҡушты
Башҡортостан Башлығы Өфөлә Халыҡ-ара ҡатын-ҡыҙҙар көнөнә арналған байрам тамамланғандан һуң килгән барлыҡ мөрәжәғәттәрҙе ентекләп өйрәнергә ҡушты.
Бөгөн хөкүмәттең оператив кәңәшмәһендә Радий Хәбиров концерттан һуң күп кенә ҡатын-ҡыҙҙар менән аралашыуы тураһында әйтте, уларҙың күбеһе «яугирҙәрҙең тол ҡатыны, йәки әсәһе».
«Уларҙы көнкүреш мәсьәләләре борсой. Барыһы ла протоколда яҙылған, һәр береһен ентекләп өйрәнергә кәрәк. Быға етди иғтибар бүлеү мөһим», — тине Радий Хәбиров.
Хәтерегеҙгә төшөрәбеҙ, 6 мартта Өфөнөң «Торатау» конгресс-холында Халыҡ-ара ҡатын-ҡыҙҙар көнөнә арналған байрам уҙҙы. Башҡортостан Башлығы ҡатнашлығындағы сараға МХО-ла ҡатнашыусыларҙың ҡатындары һәм әсәләре, күп балалы ҡатын-ҡыҙҙар һәм башҡа гүзәл зат вәкилдәре саҡырылғайны.