Мартта Өфөнән Минскиға икенсе тура авиарейс асыла
3 марттан Өфө – Минск маршруты буйынса аҙнаһына икенсе тура авиарейс асыу планлаштырыла. Был хаҡта Башҡортостан хөкүмәтендә уҙған оператив кәңәшмәлә республика премьер-министрының беренсе урынбаҫары – иҡтисади үҫеш һәм инвестиция сәйәсәте министры Рөстәм Моратов хәбәр итте.
Радий Хәбиров етәкселегендәге Башҡортостан делегацияһының Беларусь Республикаһына сәфәре барышында тура авиабәйләнеште үҫтереү тураһында килешеүҙәр төҙөлдө. Яңы тура авиарейсты асыу «Башҡортостан-Белоруссия оҙон ғүмерлелеге» проектын артабан үҫтереүгә булышлыҡ итергә тейеш, уның сиктәрендә ике йыл эсендә республикабыҙҙан өлкән йәштәге 3 меңгә яҡын кеше Белоруссияға барып ҡайтты.
Бынан алдараҡ «Башинформ» 2025-2027 йылдарға Башҡортостан менән Белоруссия араһында хеҙмәттәшлек картаһы хаҡында яҙғайны.