Бер хикмәттә, ололарҙың ғүмерен иғтибар, уларҙың кәңәштәрен тыңлай белеү оҙонайта, тиелгән. Бөгөнгө йәмғиәтебеҙҙә, әл-хәмдү лил-ләһ, был йәһәттән күркәм эштәр алып барыла.

Ошо көндәрҙә, мәҫәлән, Асҡын районының Ҡашҡа ауылында йәшәгән Хәсәнә Кәлимуллина менән Фәтхиә Фазлетдинова 90 йәштәрен билдәләне. Өлкәндәргә ошо уңайҙан күркәм тантана ойошторолдо.

Байрамда инәйҙәрҙе урындағы етәкселәр ихлас тәбрикләп, ҡотлау хаттары, иҫтәлекле бүләктәр тапшырҙы. Балалары, яҡындары, ауылдаштары ағинәйҙәргә йөрәк түренән сыҡҡан иң йылы һүҙҙәрҙе, теләктәрҙе еткерҙе, матур-матур хәтирәләрҙе иҫкә алды.

Мул табын янында хөрмәтле инәйҙәр­ҙең үҙҙәренә һүҙ бирелде. Улар ошондай оло иғтибарҙан, хәстәрлектән күҙ йәшенә мансылып, йәштәргә ихлас рәхмәтен еткерҙе.

“Донъя именлеге ошондай изге мөнәсәбәттән, бер-береңә ихтирамдан башлана. Төбәгебеҙҙәге әлегеләй күркәм йолалар киләсәктә лә дауам итһен, иншаллаһ. Һәр саҡ өлкәндәрҙең фатиха­һын алып йәшәргә яҙһын”, – тип теләне ағинәйҙәр.