– Туфли һатып алғандан һуң ям­ғыр аҫтында ҡал­дым, һәм улар кейеп бул­маҫлыҡ хәлгә етте. Һа­тыусы аҡсаны ки­ре ҡайтарыуҙан баш тартты. Ни өсөн тигәндә, мин алған туфли моделле, имеш, һәм ямғырҙа кейеүгә тәғәйенләнмәгән. Ысынлап та, тауар чегында аяҡ кейе­менең моделле икәнлеге тураһындағы яҙыу бар. Аяҡ кейеме тәғәйенләнеш буйынса бүленәме ни?
Роза.
Шишмә районы.

– ГОСТ 23251-83 билдә­ләнгән, унда аяҡ кейеменең дөйөм мәғәнәһе килтерелгән. Аяҡ кейеме – аяҡтарығыҙҙы тышҡы мөхиттән һаҡлау өсөн эшләнгән әйбер, ул утилитар һәм эстетик функ­ция­ларға эйә. Тәғә­йен­ләнеше буйынса уның көндә­лек, моделле, балалар, йорт йә спорт өсөн, миҙгеленә ҡа­рап кейелә торған һәм өлкәндәр өсөн төрҙәре бар. Аяҡ кейеме оҙағыраҡ хеҙмәт итһен өсөн, уны тәғәйенләнеше буйынса файҙаланырға кәрәк. Мәҫәлән, моделле аяҡ кейеме мода талаптарына яуап биргән осорҙа, ҡыҫҡа ваҡытта тантаналы сарала кейеү өсөн тәғәйенләнә, уны көндәлек тормошта кейеү кәрәкмәй. Тимәк, һеҙ был аяҡ кейеменең моделле икәнлеген белеп алғанһығыҙ икән, һатыу­сыға дәғүәгеҙ бу­лырға тейеш түгел. Бик тә риза булмаһағыҙ, туфлийы­ғыҙҙы бойондороҡһоҙ экспер­тизаға биреп ҡарағыҙ.