Һуңғы йылдарҙа Сибай ағинәйҙәре тарафынан кейеҙ баҫыу йолаһы киң йәйелдерелә. Милли кәсепте тергеҙеү, уны йәш быуынға еткереү, төрлө әйберҙәр яһау буйынса оҫталыҡ дәрестәре үтһенме, күргәҙмәләр ойошторолһонмо, кейеҙ баҫыусылар конкурсы булһынмы – был эштәрҙең барыһын да Сибай сәсәниәһе, Рәсәй Президенты грантына лайыҡ булған Асия Ғәйнуллина ойоштора. Ул етәкселек иткән ағинәйҙәр ҡоро ағзалары һәм үҙе белем биргән Сибай сәнғәт колледжының этно-художество бүлеге студенттары тарафынан ысын сәнғәт өлгөләре тыуҙырыла.Күптән түгел ҡалала үткән кейеҙ күргәҙмәһендә төрлө райондың иң яҡшы оҫталары үҙ эштәрен күрһәтте. Бында бер юлы кейеҙ баҫыу, унан төрлө әйберҙәр эшләү, йөн иләү буйынса ярыш ойошторолдо. Өләсәйҙәрҙән ҡалған кәсепте дауам итеүселәрҙең күплеге ҡыуандырһа, кейеҙҙән тыуҙырылған мөғжизәле әйберҙәр хайран итте. Күҙҙең яуын алыр сағыу биҙәктәр һалып эшләнгән өлгөләр үҙенең йылылығы, еңеллеге, уңайлылығы, матурлығы менән генә түгел, ә экологик яҡтан таҙа, һаулыҡҡа файҙалы булыуы йәһәтенән дә әһәмиәтле.
Бәйгелә төрлө район һәм ҡалаларҙан ҡырҡтан ашыу кеше ҡатнашты. Кейеҙ баҫыу оҫталары булып Гөлнәзирә Хәмитова (Сибай) менән Әлфиә Ибраһимова (Баймаҡ районы) танылһа, йөн иләү ярышында Йылайырҙан Рәхимә Мортаева, Шәмсикамал Мырҙагилдина, Бөрйәндән Гөлгөнә Әбделғафароваларға тиңләшкәндәр табылманы. Иң яҡшы сүбәк, йәғни кейеҙҙән аяҡ кейеме эшләү буйынса Йылайыр районының Байғужа ауылынан Зөлфирә Сыңғыҙова беренселекте алды. Иң яҡшы жилет, кәзәкей иһә – Сибайҙан Татьяна Порошконыҡы.
Күптәрҙе Әлфиә Ибраһимова, Земфира Кәримова, Миңлиза Ишмөхәмәтова, Асия Ғәйнуллиналарҙың аҡлы-ҡаралы шахмат уйынын кейеҙҙә сағылдырыуы хайран итте. Оҫталар әйтеүенсә, был эште атҡарып сығыу өсөн бер аҙнанан ашыу ваҡыт киткән, бөтәһе биш килограмм һарыҡ йөнө тотонолған. Бигерәк тә атты эшләүе ауырға тура килде, ти ағинәйҙәр.
Конкурсты ойоштороуҙа Сибай сәнғәт колледжы ҙур көс һалған. Башланғысты күтәреп алып, бар яҡлап ярҙам күрһәткән уҡыу йорто директоры Азат Ҡамбулатовҡа ағинәйҙәр, байрамда ҡатнашыусыларҙың рәхмәте сикһеҙ ине. Сибайҙа йәнә бер милли конкурсҡа нигеҙ һалынды, ул киләсәктә лә дауам ителер, тип ышанғы килә.