Башҡортостандың Мәғариф министрлығынан хәбәр итеүҙәренсә, йәйге каникул осоронда республикала 385 мең бала ял итеү, һауыҡтырыу һәм мәшғүллектең төрлө формаларына йәлеп ителәсәк. 1 июндән төбәктең дөйөм белем биреү учреждениеларында көндөҙгө лагерҙар эшләй башланы ла инде. Дөйөм алғанда, быйыл мәктәп янындағы 1916 үҙәктә 106 мең бала ял итәсәк.

— Мәктәп янындағы лагерҙарҙың смена оҙайлылығы — 21 көн. Бер кешегә йүнәлтмә хаҡы көнөнә 75 һумға тура килә. Балаларҙың ялы төбәк бюджеты иҫәбенә финанслана. Ата-әсәләр мәҙәни программалар өсөн генә түләй. Ғәҙәттә, балалар музейҙарға, театрҙарға, ҡала парктарына экскурсияға йөрөй, — тип һорауҙарға аныҡлыҡ индерҙе министрлыҡтың тәрбиә һәм өҫтәмә белем биреү бүлегенең әйҙәүсе белгес-эксперты Рәмзиә Бикҡужина.
Бынан тыш, балалар ҡала янындағы 95 лагерҙа ял итә ала. Әлегә уларҙың 23-ө асылған һәм 3 250 үҫмерҙе ҡабул иткән дә инде. Шулай уҡ йәйге каникулдар осоронда республика биләмәләрендә 390 хеҙмәт һәм ял лагерының эшләйәсәге, күп көнлөк походтар ойоштороласағы, профилле 30 лагерь асыласағы хаҡында мәғлүм.