Сочиҙа сағында Сибайҙа барған ваҡиғаларға баһа биреп, Башҡортостан Башлығы вазифаһын ваҡытлыса башҡарыусы Радий Хәбиров: “Иң мөһиме – асыҡ мәғлүмәт структураһын булдырҙыҡ. Кешеләр нимә булғанын яҡшы аңларға тейеш”, – тине. – Беҙ көнөнә биш тапҡыр һауа составын тикшерҙек, былар барыһы ла асыҡтан-асыҡ хәбәр ителде. Халыҡ дөрөҫ мәғлүмәт алғанына ышанһын өсөн, бөтә эш Сибай йәмәғәтселегенең күҙ алдында башҡарылды, – тине ул.
Ҡала башлығы Рөстәм Афзаловтың эшен баһалап, уның бурыстарын теүәл үтәүен белдерҙе. Ә Сибайҙың ҡайҙа урынлашҡанын да белмәгән әҙәмдәрҙең хәлде тотороҡһоҙландырыу маҡсатындағы сығыштарын тәнҡитләне.
– Әлбиттә, ҡаты бәрелеү насар. Бер кем дә берәүҙе лә кәмһетергә тейеш түгел. Моғайын, был хис-тойғолар эҙемтәһелер. Беҙ бөтәбеҙ ҙә хаталанабыҙ. Һәм һабаҡ алабыҙ, – тине Радий Фәрит улы.