Благовар районында йәшәгән ҡатын төбәк етәксеһе Радий Хәбировтың социаль селтәрҙәге сәхифәһендә йыл башынан алып Языков ауылында сүп-сарҙы ситкә сығарыу мәсьәләһенең киҫкенләшеүе тураһында белдергәйне. – Ҡаты коммуналь ҡалдыҡтарҙы йыйыу һәм ситкә сығарыу буйынса мөрәжәғәттәр иғтибарһыҙ ҡалмай, – тип яуап бирҙе Благовар районы хакимиәте башлығы урынбаҫары Таһир Мостаев. – Языков ауылында коммуналь ҡалдыҡтар графикка ярашлы, йәкшәмбенән тыш, көн һайын, яңы урамдарҙа шаршамбы көндәрендә ситкә сығарыла. Был график менән “Благоварские вести” район гәзитенең 15 ғинуарҙағы 5-се һанында һәм муниципаль район сайтында танышырға мөмкин.
Сүп-сар һауыттарының етмәүе хаҡында беләбеҙ, мәсьәләне хәл итәбеҙ. Ғинуар уртаһында ауыл биләмәһе өҫтәмә рәүештә 16 контейнер һатып алды, шулай уҡ сүп-сар һауыттары менән тәьмин итеү буйынса оператор менән дә һөйләшеүҙәр алып барабыҙ, уларҙы ҡуйыу урындарын билдәләйбеҙ. Яңы коммуналь хеҙмәт буйынса эште яйға һалыу өсөн бер аҙ ваҡыт кәрәклеген барыбыҙ ҙа яҡшы аңлай. Сабыр булайыҡ!