Баймаҡ районының Беренсе Этҡол ауылындағы изге күңелле, йор һүҙле ағинәйҙәр үҙҙәренең йәшәү рәүеше, балалар тәрбиәләүе, йәмәғәт эштәрендә әүҙем ҡатнашыуы менән ауылдаштарына өлгө булып тора.

Ошо көндәрҙә уларҙың береһенең – абруйлы Зәкиә Сөләймәнованың – ауыл китапханаһында “Яҙмыштарҙан юҡтыр уҙмыштар...” тигән китабының исем туйы булды.

Бар яҡлап уңған ул Зәкиә Хәмзә ҡыҙы: ижадҡа, ҡул эштәренә маһир, гөл үҫтереүгә әүәҫ, сәсән телле, ғәжәп тырыш. Уның йыр-моң һәм шиғриәт кисәһенән барса тамашасы күтәренке рух, йәшәүгә көс-дәрт алып ҡайтты.