Стәрлетамаҡта Ҡала көнө билдәләнде. Егәрле, эшсән стәрлеләр байрамды күңел асыуға ғына ҡороп ҡалманы. Был көндө логистика үҙәгенең беренсе сираты эшкә ҡушылды.

Тантаналарҙа Башҡортостан Дәүләт Йыйылышы — Ҡоролтай Рәйесе урынбаҫары Лилиә Ғүмәрова, Стәрлетамаҡ ҡалаһы хакимиәте башлығы Алексей Изотов, дүрт тапҡыр Паралимпия чемпионы, Стәрлетамаҡ ҡалаһы Советы депутаты Ирек Зарипов, яҡын-тирәләге район һәм ҡалалар башлыҡтары, предприятие етәкселәре ҡатнашты.
Логистика үҙәгенең асылыуы — республика кимәлендәге мөһим ваҡиға. Стәрлетамаҡтар беренселәрҙән булып Башҡортостан Президенты Рөстәм Хәмитов ҡуйған бурысты үтәне. Президент, аҙыҡ-түлек баҙарында хаҡтарҙың “бәйһеҙ” булыуына хафаланып, мәсьәләне тикшерергә һәм хәл итеү юлдарын эҙләргә ҡушҡайны. Билдәле булыуынса, республикала аҙыҡ-түлек тауарын ваҡлап һатыу күмәртәләп һатыуға ҡарағанда нығыраҡ үҫешкән. Шул сәбәпле хаҡтар йыш “һикерә”. Әлеге хәлде яйға һалыу өсөн эре ҡалаларҙа һәм район үҙәктәрендә күмәртәләп һатыуҙы арттырыу буйынса яңы логистика үҙәктәрен сафҡа индереү кәрәк ине. Ә стәрлетамаҡтар был бурысты тәүгеләрҙән булып тормошҡа ашырҙы.
Яңы асылған үҙәктә тәьмин итеүселәрҙән тауар ҡабул итәләр, уларҙы һаҡлау урындарын билдәләйҙәр һәм магазиндарға оҙаталар. Был хаҡта “Тандер” ябык акционерҙар йәмғиәтенең Көнсығыш төбәге директоры Василий Лапкин һөйләне. Ул ҡунаҡтарға үҙәктә экскурсия ойошторҙо, административ, көнкүреш биналарын, складтарҙы һәм тауар ҡабул итеү урындарын күрһәтте. Бында бөгөндән 800-гә яҡын кеше өсөн эш урыны булдырылған. Үҙәктең икенсе сираты асылыу менән ул 1100-гә тиклем артасаҡ, ә тулы ҡеүәтендә эшләй башлаһа, мең ярым самаһы кеше эш менән тәьмин ителәсәк. Яңы логистика үҙәгенең социаль әһәмиәте лә баһалап бөткөһөҙ. Бюджетҡа һалым күберәк инәсәк, урындағы тауар етештереүселәргә һатыу мөмкинлеге буласаҡ, ә иң мөһиме, хаҡтар бик артмаясаҡ.
— Беҙҙең хаҡтар, башҡа күмәртә магазиндары селтәре менән сағыштырғанда 3 — 5 процентҡа ғына кәмерәк булһа ла, был яҡшы күрһәткес, — ти компания вәкилдәре.
Тулы ҡеүәтендә үҙәк йыл аҙағында эшләй башлаясаҡ. Уның дөйөм майҙаны — 16 гектар, шул иҫәптән 46500 квадрат метры — келәттәр.
— Республика Президенты эре күмәртәләп һатыусыларҙы магазиндарға яҡынайтыу бурысын ҡуйғайны. “Магнит” компанияһы менән бер йыл элек хеҙмәттәшлек итә башланыҡ һәм уртаҡ тел таптыҡ, — ти Стәрлетамаҡ ҡалаһы хакимиәте башлығы Алексей Изотов. — Беҙ уларға ер участкаһы бүлеп бирҙек, хәҙер улар 500 километр араһындағы эре ҡалаларҙы тауар менән тәьмин итә. Бында Стәрлетамаҡ, Өфө, Орск, Ырымбур, Магнитогорск кеүек ҡалалар ҙа эләгә.
Ҡунаҡтар ҡыҙыҡһынып логистика үҙәге менән танышты, уның нисек эшләүен күҙәтте, һорауҙарға яуаптар алды. Аҙаҡ ҡаланың тыуған яҡты өйрәнеү музейында булдылар. Унда улар ҡаланың һәм төбәктең тарихы, бөгөнгөһө менән танышты.
Ә был ваҡытта Стәрлетамаҡтың төрлө майҙандарында байрам ҡыҙғандан-ҡыҙҙы. Балалар асфальтта һүрәт төшөрҙө, спорт ярыштарында, ҡыҙыҡлы бәйгеләрҙә ҡатнашты, шулай уҡ концерттар үтте. Өлкәндәр өсөн дә спорт ярыштары ҡаралғайны: еңел атлетика, волейбол, теннис, футбол, стритбол буйынса турнирҙар уҙғарылған урындан кеше өҙөлмәне.
Ҡала көнө менән бергә Химиктар көнө лә билдәләнде. Байрам төнгә тиклем дауам итте, ул сағыу концерт һәм салют менән тамамланды.