Редакция почтаһындағы хат-хәбәрҙәргә күҙәтеү.Йыл аҙағында редакция почтаһы һиҙелерлек йәнләнде: күптәр Яңы йыл алдынан үҙ төбәгендә үткән матур ваҡиғалар ҡыуанысы менән уртаҡлашырға теләне, бәғзеләр отош уйындарына гәзиткә яҙылыу тураһында квитанцияһын ебәреп, бәхетен һынап ҡарарға ашыҡты. Квитанция күсермәһенә ҡушып, матур теләктәрен, тәҡдимдәрен еткергән тоғро дуҫтарыбыҙҙың хат юлдарына күҙ һалайыҡ.
“Башҡортостан” гәзитен үткән быуаттың 50-се йылдары аҙағынан алдырам. Һуғыш осоро балаһы булараҡ, тиҫтерҙәремдең яҙмышы, уларҙың күргән-кисергәндәре тураһында уҡырға яратам. Яңы һанды ҡулға алыу менән иң тәүҙә оло быуын вәкилдәре тураһындағы мәҡәләләрҙе ҡарайым, күптәрен уҡығанда күҙгә йәш тула. Һуғыш осоро балалары ветерандар ише йылдан-йыл кәмей, шуға күрә үҙҙәре иҫән саҡта улар хаҡында күберәк яҙһағыҙ ине...
Хәлит АБДРАФИҠОВ,
хеҙмәт ветераны.
Стәрлетамаҡ ҡалаһы”.
* * *
“Бөгөн матбуғат баҫмаларының йәнең теләгәненә яҙылырға мөмкин. Әммә уларҙың тиражының йылдан-йыл кәмеүе күңелде ҡыра. Бер гәзит-журнал да алдырмаған таныштарымдан бының сәбәбен һорашҡаным бар. Яуаптар төрлөсә: аҡса етмәй, уҡырға ваҡыт юҡ һәм башҡалар. Мин йыл һайын дүрт-биш милли баҫмаға яҙылам. Пенсияға ҡарап йәшәһәм дә, аҡса ла еткерәм, уҡырға ваҡыт та табам. Ә бит күптәр бөтмәҫ байрамдарҙы, тыуған көндәрҙе билдәләүгә, унан бигерәк өҫтәл тултырып иҫерткес эсемлек һатып алыуға аҡса йәлләмәй. Уларҙың да хаҡы арзан түгел бит: ике-өс шешәһе – ярты йыллыҡ гәзит хаҡы. Ә көн һайын 100-әр һумға тәмәке алыуға күпме сығым китә...
Матбуғат – ул кәңәшсебеҙ, уны уҡып күпме файҙа алырға мөмкин, милләттәштәрем ошо хәҡиҡәтте аңлаһын ине.
Нурулла МИҺРАНОВ.
Өфө ҡалаһы”.
* * *
“Башҡортостан”ды иҫ белгәнемдән алып уҡыйым. Гәзитте ҡунаҡ көткән кеүек көтөп алам. Уҡымлы гәзит сығарғанығыҙ өсөн ҙур рәхмәт!
Н. ХӘМИТОВ.
Дүртөйлө ҡалаһы”.
* * *
“Миңә 86 йәш, “Башҡортостан” гәзитен 70 йылдан ашыу алдырам, унһыҙ тормошомдо күҙ алдыма ла килтерә алмайым. Бик йөкмәткеле, фәһемле гәзит.
Рәшит ИҘРИСОВ.
Ейәнсура районы”.
* * *
Ишембайҙан Рәйлә ҠОЛМЫРҘИНА башланып торған яңы йылға изге теләктәрен шиғри юлдарға һалған:
“Хоҙай биргән ғүмер – беҙгә бүләк кенә,
Үтһә ине һәр бер йылыбыҙ
Һаулыҡ, иман, хәләл кәсеп менән.
Көтәбеҙ беҙ һинән
Зирәклек һәм айыҡ аҡыл,
Төклө аяғың менән кил һин, Яңы йыл!”
Ырымбур өлкәһенән Дауыт АМАНГИЛДИН сираттағы ялында Көйөргәҙе районының Яҡшымбәт ауылында йәшәгән туғандарына барып ҡайтыуы, туғаны Зилә Түләкова эшләгән мәктәптә осрашыуҙа ҡатнашыуы, ундағы бай музей менән танышыуы тураһында яҙып ебәргән. “Музейҙың беҙҙе үткәндәр менән тоташтырған бер хазина икәнен ашыҡмай ғына экспонаттарҙы ҡарағанда тағы нығыраҡ аңлайһың. Зилә Дамир ҡыҙының был музейҙы ойоштороуға күп көс һалыуы билдәле. Музейҙағы экспонаттар араһында иң ҡиммәтлеләренең береһе – Яҡшымбәт ауылының зауыҡлы итеп эшләнгән шәжәрәһе”, – тигән юлдар бар хатта.
“Өфөләге Шәһит Хоҙайбирҙиндың йорт-музейының ғилми хеҙмәткәре Рәзилә Ырыҫҡужина Башҡортостан Республикаһының халыҡ, РСФСР-ҙың атҡаҙанған артисы Тамара Шәһит ҡыҙы Хоҙайбирҙинаның тыуыуына 95 йыл тулыуға арнап күләмле хеҙмәт башҡарҙы: республика йәмәғәтселеге “Сәхнәләрҙән остоң күктәргә, дәрт ҡанаты ҡуйып күптәргә” тип аталған хәтирәләр китабын бик йылы ҡабул итте”, – тип башлана Мәликә МОРТАЗИНАНЫҢ хаты.
Артабан ул китап авторы менән Күгәрсен районының Хоҙайбирҙин ауылында ойошторолған матур осрашыу, балалар баҡсалары тәрбиәләнеүселәре, мәктәп уҡыусылары, мәҙәниәт йорто хеҙмәткәрҙәре ҡатнашҡан бейеү байрамы тураһында бәйән итә. “Китапҡа хоҙайбирҙиндар ҙа үҙ өлөшөн индергән. Шулай булмауы мөмкин түгел, сөнки Тамара Шәһит ҡыҙы иҫән сағында был ауылда йыш була, туғандары, атаһының ауылдаштары менән аралашып йәшәй”, – ти автор.
Ҡыйғы районынан Ләлә САҘРЕТДИНОВА Туғыҙлы ауылында үткән ҡаҙ өмәһе, был матур йоланы атҡарыуға ҙур өлөш индергән Клара һәм Абдулбарый Ғирфановтарҙың тырыш ғаиләһе тураһында яҙып ебәргән. “Уңған ҡатын-ҡыҙҙар эште етеҙ генә башлап ебәрҙе. Иң тәүге булып ҡаҙ йолҡоуға, халҡыбыҙҙың яратҡан йыры “Ҡаҙ ҡанаты”н йырлай-йырлай, хужабикәнең әхирәте Сания Ғарипова тотондо. Уға Әлфирә Ғәниева, Фәриҙә Ғарипова, Фәнзирә Носратуллина, Фәнүзә Ғәниева, Юлиза Сәйфуллина ҡушылды. Улар барыһы ла – урындағы “Шишмәләр” фольклор ансамбле ағзалары, талантлылар һәм уңғандар”, – тип матур йоланың урын-еренә еткерелеп башҡарылыуы тураһында бәйән итә хат авторы.
Бөрйән районынан Сәйҙә СӘЙӘХОВА Яуымбай ауылы балалар баҡсаһының капиталь ремонттан һуң өр-яңы төҫ алыуы, бәләкәстәрҙең заманса йыһазландырылған балалар баҡсаһына күсеп, ҙур шатлыҡ кисереүе хаҡында һөйөнөслө хәбәр менән уртаҡлаша.
“Яуымбай ауылында балалар баҡсаһын яңы бинаға күсереү күптән өлгөрөп еткән мәсьәлә ине. Был эште атҡарып сығыуҙа, әлбиттә, Байназар мәктәбе директоры Йәмил Ҡотлобаевтың һәм ауыл хакимиәте башлығы Айрат Салауатовтың роле баһалап бөткөһөҙ булды. Улар икеһе лә – йүнселлекте йүгәнләгән һәләтле, ауылдаштарының тормошон яҡшыртыу өсөн көсөн дә, ваҡытын да йәлләмәгән етәкселәр. Шулай уҡ эш барышында даими иғтибар бүлгән Бөрйән район хакимиәте башлығы Рөстәм Шәриповҡа, район хакимиәтенең мәғариф бүлеге начальнигы Ришат Шәриповҡа, Ишморат Муллағолов етәкселегендәге Яуымбай филиалы коллективына, баҡсаның өлкән тәрбиәсеһе Ләйсән Медаеваға, мәктәпкәсә төркөм хеҙмәткәрҙәренә, ауылдағы ата-әсәләргә рәхмәт”, – тигән юлдар бар уның хатында.
Быйыл да редакциябыҙ почтаһы һеҙҙең хат-хәбәрҙәр менән тулы булһын. Беҙ уларҙы гәзит биттәрендә баҫып, шатлыҡ-ҡыуаныстарығыҙ менән уртаҡлашырбыҙ, хәсрәттәрегеҙҙе таратырбыҙ, һеҙҙе борсоған мәсьәләләрҙә ярҙам итергә тырышырбыҙ.