Йырҙарҙа йырланған Ҡаҫмарт йылғаһы аша күпер һалына башлауы тураһында хәбәр иткәйнек инде. Ошо көндәрҙә уны асыу тантанаһы булды. Оло ваҡиғаны яҡында урынлашҡан Ейәнсура районының Сәғит ауылы ғына түгел, ә эргә-тирәләге тағы ла ете ауыл кешеләре Яңы йыл алдынан ҙур бүләк итеп ҡабул итте.

Ейәнсура районы хакимиәте башлығы Дәмин Юланов билдәләүенсә, быға ябай ғына күҙлектән ҡараш ташларға ярамай, ул - тотош төбәктең һәм Байыш ауылы биләмәһенең киләсәген хәл иткән күпер. Ғөмүмән, мөҡәддәс бурыстарҙың береһе – халыҡҡа уңайлыҡтар тыуҙырыу, ғаиләләрҙе хәстәрләү, эш урындары булдырыу.

Тантанала шулай уҡ Дәүләт Йыйылышы – Ҡоролтай депутаты Әлфәрис Байсуриндың ҡатнашыуы сараға мәртәбә өҫтәне.
Күперҙең оҙонлоғо – 102 метр, уның тирә-яғы тәртипкә килтерелгән.