2014 йылдан алып илдә Билдәһеҙ һалдат көнө үткәрелә. Фронттан тыуған яғына ҡайтырға яҙмаған яугирҙәр иҫтәлегенә арналған иҫтәлекле лә, ҡайғылы ла көн был.

Саҡмағош үҙәк китапханаһында ошо датаға арналған “Хәтер ҙә, ҡаһарманлыҡ та, быуаттарға етерлек ҡайғы ла” тип аталған батырлыҡ дәресендә ҡатнашыусылар төбәктәрендәге һуғыш батырҙары, хәбәрһеҙ юғалған яҡташтары тураһында мәғлүмәттәр менән танышты, иҫкә алды, шиғырҙар уҡыны. Билдәһеҙ һалдаттарҙың кәүҙәһен Туғандар ҡәберлегенән Мәскәүҙәге Александр баҡсаһына ҡайтанан ерләү тураһында документаль видеоматериал һәр кемде тетрәндерҙе.