Миңә быйыл Башҡортостаныбыҙҙың данлыҡлы һәм шифалы “Красноусол” шифаханаһында ял итеү бәхете тейҙе. Үҙем Ғафури районының Бурлы ауылында тыуып үҫтем һәм баш ҡалала йәшәйем, 90 йәш тула, һуғыш һәм хеҙмәт ветеранымын. Әйтергә кәрәк, был шифаханала 21-се тапҡыр һаулығымды нығыттым.Был юлы ла сәләмәтлек йорто бик яҡшы ҡаршы алды, 6-сы корпус мөдире Рәмзиә Хисаметдинова йылы һүҙе, иғтибары менән әсир итте. Урынлашҡан бүлмәмдә бөтә уңайлы шарттар булдырылғайны: көн дә таҫтамал яңырталар, миңә билдәләнгән врач-терапевт Илиза Баҡыева, шәфҡәт туташы Эльза Рәхимова ла иғтибарлы ҡарашы, яғымлы мөнәсәбәте менән иҫтә ҡалды. Ә дауалау төрҙәре иҫ киткес шәп һәм күп төрлө.
Киләһе йылға 95 йыллыҡ юбилейын билдәләйәсәк шифахананы ысынлап та сәләмәтлек йорто тип ғорурланып әйтеп була. Баш табип Фаяз Харис улы Мәжитов ышаныслы, эшһөйәр коллектив туплаған. Оҫта ҡуллы массажистар Эльза Саяпова, Владимир Епифанов үҙ эштәрен намыҫлы башҡара, яҡшы мөғәмәлә итеүҙәре менән хәтерҙә уйылып ҡалдылар.
Ғөмүмән, шифаханала һуғыш һәм хеҙмәт ветерандарына иғтибар ҙур: дауалау корпусына машина илтте, шәфҡәт туташы оҙата барҙы. Ашхана хеҙмәткәрҙәре бик тәмле аштар әҙерләй. Мине һәр саҡ мул өҫтәл көттө. Көн дә ҡан баҫымымды үлсәп, УЗИ үткәреп, дөрөҫ дауалау һөҙөмтәһендә сәләмәтлегем бермә-бер яҡшырҙы.
Шифахананың барлыҡ коллективын, баш табип Фаяз Мәжитовты етеп килгән Яңы йыл байрамы менән ҡотлайым, алдағы көндәрҙә лә республикабыҙҙың йөҙөк ҡашы булырҙай шифахананың данын, абруйын арттырып, етеп килгән күркәм юбилейығыҙҙы яҡшы ҡаршы алырға, яңынан-яңы үрҙәргә өлгәшергә яҙһын!