Башҡортостан Башлығы вазифаһын ваҡытлыса башҡарыусы Радий Хәбиров Баймаҡ ҡалаһындағы эш сәфәрендә район дауаханаһында булды һәм балалар бүлексәһе хеҙмәткәрҙәре менән осрашты.

Балалар консультацияһына төрлө ауылдарҙан 15 меңдән ашыу һәм Баймаҡтан 6 мең бала ҡарай. Әммә бинаның үткән быуаттың 70-сы йылдарҙа төҙөлөүе һәм шунан бирле капиталь ремонт күрмәүе, һис шикһеҙ, заман талаптарына яуап бирмәй. Шул уҡ ваҡытта табиптарҙың, педиатрҙарҙың етешмәүе лә - бөгөндән үк хәл ителергә тейешле мәсьәләләрҙең береһе.



Төбәк етәксеһе киләсәктә Баймаҡта өр-яңы балалар поликлиникаһы төҙөү кәрәклеген белдерҙе. “Балалар һаулығы өсөн беҙ бер нимә лә йәлләргә тейеш түгелбеҙ. Табиптарҙың етешмәүенә килгәндә, быны бөгөндән үк хәстәрләү кәрәк”, - тине ул.