Байрамдары уңайынан Дәүләт Йыйылышы – Ҡоролтай Рәйесе Константин Толкачев “Башҡортостандың йыл уҡытыусыһы”, “Йылдың йәш уҡытыусыһы” республика конкурстары еңеүселәрен ҡотланы.

– Һеҙ төплө белем биреп кенә ҡалмайһығыҙ, ә шәхес тәрбиәләүҙә лә әүҙем ҡатнашаһығыҙ, – тине Константин Борисович. – Бөгөн мәғариф системаһын үҫтереү буйынса илебеҙ етәкселеге тарафынан ифрат ҙур эштәр баш­ҡарыла, мәғариф тармағы – дәүләт сәйәсәтенең өҫтөнлөклө йүнә­лештәренең береһе. Рәсәй Президенты ла был хаҡта йыш сығыш яһай.

Парламент спикеры билдәлә­үен­сә, уҡытыусы һәр ваҡыт эҙлә­нергә, белемен камиллаштырырға тейеш, сөнки хәҙер төрлө яҡтан мәғлүмәт күп ағыла. Балаларҙы яҡ­шылыҡҡа өндәү, изге маҡсаттарға дәртләндереү белем биреү менән бергә алып барыла.

Константин Толкачев сәфәре барышында халыҡ, бигерәк тә педагогтар менән даими осрашыуы тураһында һөйләне, мөғәл­лимде борсоған мәсьәлә уға ла ят булмауын һыҙыҡ өҫтөнә алды, хәл-торошто еңеләйтеү өсөн ҡулдан килгәндең барыһын да тормошҡа ашырырға тырышыуҙы белдерҙе.

Өфө ҡалаһындағы 5-се ли­цейҙың башҡорт теле һәм әҙә­биәте уҡытыусыһы, быйыл баш­ҡорт теле һәм әҙәбиәте уҡытыу­сылары араһында ойошторолған республика конкурсында еңеү яулаған Нурзилә Нәҙерғолованың һүҙ­ҙәренә ҡарағанда, ул быға тиклем дә үткәрелгән бәйгеләрҙә ҡат­нашып әҙме-күпме сыныҡҡан. Мәҫәлән, студент йылдарында башҡорт теле һәм әҙәбиәте уҡытыусыларының төбәк-ара ярышында II урынды алған, артабан инде ҡала кимәлендәгеһендә “Милли традицияларҙы һаҡлау” номинацияһында алдынғылыҡты бирмәгән. Төрлө конкурстарҙа ҡатнашыу дуҫтар табыуға булыш­лыҡ иткән, ул аныҡ маҡсаттар билдәләргә өйрәткән.

– Бөгөнгө башҡорт теле уҡы­тыусыһы заман менән бергә ат­ларға, яңы алымдарҙы ҡулланырға тейеш, – тине сығышы менән Йылайыр районының Ҡашҡар ауылынан булған Нурзилә Дәүләт­гәрәй ҡыҙы. – Үҙем уҡытыусылар ғаиләһендә үҫтем, атайым да, әсәйем дә һәр ваҡыт һәр йәһәттән дә үҫеш яғында булды.

Шулай уҡ Өфө ҡалаһының 110-сы мәктәбенән Любовь Александрова (физика уҡытыусыһы), 60-сы лицейҙан Евгения Рощупкина (биология), 130-сы мәктәптән Артем Баянов (математика), Стәрлетамаҡ ҡалаһының 20-се мәктәбенән Римма Ғәлиева (татар теле һәм әҙәбиәте), 7-се мәктәптән Олег Саргаев (информатика) Дәүләт Йыйылышы – Ҡорол­тайҙың Маҡтау хаты менән бү­ләкләнде.