Башҡортостандың мәғариф министры Гөлназ Шафиҡова Бөтә Рәсәй олимпиада һәм конкурс призерҙары һәм еңеүселәре, “Йәш профессионалдар” VI милли чемпионат финалы призерҙары менән осрашты. Сарала шулай уҡ республикабыҙҙың юғары уҡыу йорттары ректорҙары, проректорҙары ҡатнашты.

Фойела үҫмерҙәрҙең һөйләшеп һүҙҙәре бөтмәй. Кемдер донъя кимәлендәге ярышта дан ҡаҙанған, икенселәр ил буйынса бәйгелә алдынғылыҡты бирмәгән, республи­кабыҙ кимәлен яҡлаған.

– Һеҙҙе традицион “Башҡортос­тан өмөтө” форумында күреүгә бик шатбыҙ. Сара тиккә генә шулай атал­май, тәү сиратта, беҙ нәҡ ошонда киләсәктә республикабыҙ үҫешенә өлөш индерәсәк йәштәрҙе күрәбеҙ, – тине Гөлназ Радмил ҡы­ҙы. – Әле янығыҙҙа ректор­ҙар ултыра. Әйткәндәй, һеҙҙең арала буласаҡ министрҙарҙы һәм ректорҙарҙы ла төҫмөрләйбеҙ. Бынан ары инде бергәләп һеҙҙең һәләтегеҙҙе үҫтереү тәңгәлендә эшләрбеҙ тип уйлайбыҙ.

Гөлназ Шафиҡова белдереүен­сә, Баш­ҡорт­останда баланың һә­ләтен үҫтереү буйынса күп уй-ниәттәр бойомға ашырыла. Был эш кескәй саҡтан уҡ башлана, мәктәпкәсә йәштәге ҡыҙ һәм малайҙар төрлө олимпиа­даларҙа ҡатнаша. Ошо залда ултырған үҫмерҙәрҙең күбеһе бәләкәйҙән үк ниндәйҙер бәйгеләргә йөрөгән.

Башҡортостан Мәғарифты үҫте­реү институтының Уҡыусы­ларҙың һәләтен үҫтереү ғилми-методик үҙә­ге директоры урынбаҫары филология фәндәре кандидаты Гөлназ Әхмәҙуллина һөйләүенсә, һуңғы йылдарҙа һәләтле балалар менән эшләү бик йәнләнгән. Айырыуса республика етәкселегенең даими хәстәре тойола, һәләтле студент­тарға стипендия түләү ҡаралған, халыҡ-ара һәм Рәсәй кимәлендәге конкурстарҙа еңеүселәр юғары уҡыу йорттарына конкурстан тыш уҡырға алына.

Башҡорт теле һәм әҙәбиәте буйынса ойошторолған олимпиадала еңеү яулаған, хәҙер Туймазы юридик колледжы студенты Дилара Ғабдрафиҡова әйтеүенсә, Баш­ҡортостанда балаға төрлө яҡлап үҫешеү өсөн яҡшы шарттар булды­рылған. Ул бәләкәйҙән һәр төрлө конкурстарҙа ҡатнашып, тәүге урындарҙы яулаған.

– Ниәтем – Өфө дәүләт нефть техник университетына уҡырға инеү, – тип һөйләй Илеш райо­ны­ның Муса Гәрәев исемендәге Биш­ҡурай урта мәктәбенең XI класс уҡыусыһы Айнур Ғилманов. – Бәлә­кәйҙән техниканы үҙ иттем, уйын­сыҡ автомобиль булһынмы, бүтән төрлө конструкциямы, ҡыҙыҡ­һынып, уны һүтеп йыйырға яраттым.

Был егет һәм ҡыҙҙарҙың барлыҡ уй-хыялдары тормошҡа ашыр, үҙҙәре Башҡортостаныбыҙға файҙа килтерер, тип ныҡлы ышанабыҙ.