Ишембай районында ла һайлауҙар гөрләп бара. Һайлау участкалары асылыу менән халыҡ ағыла башланы. Күптәр йорт мәшәҡәттәре ныҡлап башланғансы һайлап ҡуяйыҡ, тип аңлата быны.

Мәҫәлән, Йәнырыҫ ауылында сәғәт 11-ҙә һайлаусыларҙың 35 проценты гражданлыҡ бурыстарын үтәп өлгөргән дә инде.

— Беренсе тапҡыр һайлаусыларыбыҙ ҙа бар. Улар дүртәү, яуаплылыҡ тойоп, дәртләнеп киләләр, — ти ауыл советы хакимиәте башлығы Миңлейәр Маннанов.

Әрмет Рәхим ауылында урынлашҡан 2169-сы һайлау участкаһында 309 кеше тауыш бирергә тейеш. 11.30 сәғәттә шулай уҡ 30 проценттан ашыу һайлаусы тауыш биргән. Тәүге тапҡыр һайлаусылар – икәү.

— Бәрәңге алған мәл – мәшәҡәтле осор, әммә кемдер ҡулына көрәк тотор алдынан һайлау участкаһында ҡәләм алды. Кемдер һуңыраҡ киләсәк, — ти клуб мөдире, урындағы комиссия рәйесе Йәмилә Фәхриева.

Ғөмүмән, Ишембай районында иртәнге 10-да һайлаусыларҙың 5,4 проценты тауыш биреп өлгөргәйне инде.