Стәрлетамаҡ ҡалаһының Көнбайыш биҫтәһендә 1225 урынлыҡ мәктәп һалына. Ул “Башҡортостандың 100 йыллығына – 100 объект” проекты сиктәрендә ҡалҡасаҡ. – Дөйөм алғанда, эш барышы менән ҡәнәғәтмен. Шулай ҙа тәҡдимдәрем дә бар: объект мәшәҡәттәре тамамланып килә, ә мәктәптең тирә-яғы йүнләп төҙөкләндерелмәгән. Был мәшәҡәттәргә көҙгө бысраҡтар башланғансы, мөмкин тиклем иртәрәк тотонорға кәңәш итәм, – тип мөрәжәғәт итте төҙөүселәргә объектҡа сираттағы эш сәфәрендә ҡала хакимиәте башлығы Владимир Куликов.
Ҡайһы бер һөҙөмтәләр буйынса ул маҡтаһа, килеп етмәгән төҙөлөш материалдары өсөн шелтәләп тә алды. Төҙөүселәр эштәрен сентябрь-октябргә тамамлап, бәлки, балаларға шәп бүләк яһар тигән өмөттәрен дә белдерҙе Владимир Иванович.
Нисек кенә булмаһын, эстән дә, тыштан да егеттәргә эш етерлек. Объект та бәләкәй түгел шул: дүрт ҡатлы бинала дүрт блок ҡаралған, тантаналар залы менән ашхана ғына ла бер юлы 400-ҙән ашыу баланы һыйҙырырлыҡ итеп эшләнә. 300 квадрат метрға яҡын майҙанлы ике спорт залы буласаҡ. Бынан тыш медицина блогы, компьютер-интерактив комплекс, музей ҡаралған. Йәнә шуныһын айырым билдәләп китергә кәрәктер: мәктәп мөмкинлектәре сикләнгән уҡыусылар өсөн ҡулайлаштырылып төҙөлә, мәҫәлән, өҫкө ҡаттарға махсус лифт ярҙамында күтәреләсәктәр. Ғөмүмән, ағайҙары эште тамамлағас, балаларға тырышып уҡырға ғына ҡала.
– Финишҡа сыҡтыҡ. Эске эштәрҙе генә лә 150-нән ашыу кеше башҡара. Инженерлыҡ мәшәҡәттәре тамамлана. Объект ағымдағы йылдың 4-се кварталында тапшырылырға тейеш, – тине төҙөлөштөң генераль подрядсыһы, СУ-10 компанияһы етәксеһе урынбаҫары Марат Дәүләтшин. Тимәк, киләһе уҡыу йылында балалар яңы мәктәптә уҡыясаҡ. Әйткәндәй, әлеге белем усағына килергә теләүселәр бөгөндән үк меңдән ашҡан. Улар ҙа эштең тамамланыуын түҙемһеҙләнеп көтә.
Стәрлетамаҡ ҡалаһы.