– Беҙ өс бала тәрбиәләйбеҙ, ҡыҙҙарыбыҙға ун бер, ете һәм өс йәш. Быйыл икенсе ҡыҙыбыҙ мәктәпкә бара. Күп балалы ғаилә­ләргә мәктәп формаһы һатып алыу өсөн матди ярҙам ҡаралған, тиҙәр. Ошо хаҡта тулыраҡ мәғлүмәт бирһәгеҙ ине.

Рәмзилә ОМОРҘАҠОВА.
Өфө ҡалаһы.

Башҡортостан Республикаһы Мәғариф министрлығының дөйөм мәғариф өлкәһендә дәүләт сәйәсәте бүлеге начальнигы Жанна МИНИКӘЕВА:
– Һатып алынған мәктәп фор­маһы йәки күнекмәләр өсөн тәғәйен балалар кейеме тупланмаһы өсөн аҡсалата компенсация алыу хоҡу­ғына дәүләт һәм муниципаль дөйөм белем биреү ойошмаларында уҡыусылар эйә. Ғаиләлә өс һәм унан күберәк бәлиғ булмаған (сираттағы уҡыу йылының 1 сентябренә ҡарата 18 йәше тулмаған) бала тәрбиә­ләнеүе, ғаилә ағзаларының йән башына уртаса килеме йәшәү минимумынан артмауы шарт. Күп балалы ғаилә статусын билдәләгәндә уллыҡҡа йәки тәрбиәгә алынған балалар ҙа иҫәпләнә.
Аҡсалата компенсация ата-әсәнең (законлы вәкилдәрҙең) береһенә ике уҡыу йылына бер тапҡыр мәктәп формаһы алыуға киткән сығым күләмендә бирелә, әммә ул Башҡортостан Респуб­ликаһы Хөкүмәте билдәләгән максималь күләмдән артыҡ була алмай.
Был ярҙамды алыу өсөн ата-әсә 1 октябргә тиклем бала уҡыған белем усағына кәрәкле документтарҙы тапшырырға тейеш.