Әбүбәкер ауылында “Һаумыһығыҙ, ауылдаштар!” байрамы үҙе бер һабантуйҙы хәтерләтте: уйын-көлкө, йыр-моң, төрлө уйындар менән үрелеп барған байрамда олоһо ла, кесеһе лә берҙәй ҡатнашты.


Федоровка ауыл биләмәһе башлығы Наталья Лебедова сараны асып, әбүбәкер­ҙәр­ҙең бер­ҙәм һәм дәртле булыуҙарын, бай­рамға оло теләк менән әҙер­ләнеүен бил­дәләне. Сарала Дәүләт Йыйылышы – Ҡоролтай депутаты Рөстәм Аблаев, район хакимиәтенең социаль мәсьә­ләләр буйынса урынбаҫары Миңзәлә Баймыр­ҙи­на һәм башҡа абруйлы ҡунаҡтар ҡатнашты.
Хәйбулла районында “Һаумы­һығыҙ, ауылдаштар!” байрамы бынан 30 йыл элек тәүге тапҡыр тап Әбүбәкер ауылында башлана. Быйылғы сарала ауылдаштарына өлгө булырлыҡ ғаиләләр тәбрикләнде, яңы өйләнешкән парҙар билдәләнде. Шуныһы иғтибарға лайыҡ: шул мәлдә өйләнешкән парҙар – Зөлфирә һәм Альфрет Билаловтар, Фәймә һәм Рамазан Назаровтар, Гөлйө­ҙөм һәм Хәйҙәр Атановтар – хәҙер инде үҙҙәре олатай-өләсәй булып, балалар үҫтереп, матур ғүмер кисерә.
Шулай уҡ алтын туйҙарын билдәләгән Фәниә һәм Әмир Бигушовтар, Сания һәм Әмир Әли­баевтарға иҫтәлекле бүләктәр тап­шырылды. Ауылдағы иң өлкән шә­хестәр Зәйтүнә Сынбулатоваға – 89 йәш, Зәйнулла Билаловҡа – 88 йәш.
Быйылғы байрамды ойошто­роуға күп көс һалған ауыл мәҙәниәт хеҙмәткәрҙәренә, ҡатын-ҡыҙҙар ойошмаһына, ауыл хакимиәтенә рәхмәтле әбүбәкер­ҙәр. Был көндә һәр кем туған­дары, дуҫтары менән осрашты, атай нигеҙенә йәнә бер тапҡыр ҡайтып, тыуған ер, тыуған төйәк йылыһын татыны, уның ҡөҙрәтен тойҙо, изге тупраҡтан көс һәм дәрт алды. Иң мөһиме – бындай осрашыуҙар туғанлыҡ ептәрен нығыта, быуындар бәйләнешен ялғай, атай нигеҙенең бәҫен арттыра, ауылдаштары алдында яуаплылыҡ тойоуға ярҙам итә.

Хәйбулла районы.