Үрге Иҙрис ауылында йәшәүсе Рәшиҙә менән Низаметдин Сафиуллиндарҙың тормош юлы еңелдән булмай. Әрме хеҙмәтен тултырып ҡайтҡан улдарының һәм, яңы донъяға килеп, оҙаҡ та йәшәмәгән ҡыҙҙарының үлеменән һуң улар йәшәү мәғәнәһен юғалта. Һәр кемдең үҙ-ара күңелдәрен ҡыймаҫҡа тырышып, ҡайһы саҡта бер-береһенә күтәрелеп ҡарарға ла баҙнат итмәй артабан йәшәргә тырышыуы нисектер яһалма килеп сыға.

Көндәрҙең береһендә, оҙаҡ уйлағандан һуң, ныҡлы ҡарарға килеп, Сафиуллиндар балалар йортонан бер ҡыҙ алырға батырсылыҡ итә. Район үҙәгенә барып, кәрәкле инстанциялар аша үтеп, бар документтарын ҡалдырып, ҡасан да уйҙарының тормошҡа ашырын түҙемһеҙлек менән көтә улар. Ниһайәт, күптән көтөлгән шылтыратыу алына. Тиҙ генә йыйынып, ғаилә Сибай ҡалаһына юл тота.
— Бер ҡыҙ алабыҙ тип барғайныҡ, ике ҡыҙлы булып ҡайттыҡ, — тип йылмая Рәшиҙә Йыһаннур ҡыҙы. – Туғыҙ йәшлек Альбинаның кескәй Алина исемле һеңлеһе барлығын әйткәстәр, туғандарҙы нисек айыраһың, тип икеһен дә: “Бер ай ғаиләлә аралашығыҙ, өйрәнегеҙ, аҙаҡ ҡарарығыҙҙы әйтерһегеҙ. Ниндәй ҡарар ҡабул итһәгеҙ ҙә, һеҙҙе аңлаясаҡбыҙ”, — тип ҡайтарып ебәрҙеләр. Ауырлыҡтар булманы түгел, булды. Шулай ҙа беҙ яһаған аҙымыбыҙға бер ҡасан да үкенгәнебеҙ юҡ.
Әлбиттә, сит баланы үҙеңдеке кеүек тәрбиәләү еңелдән түгел. Үкенгән саҡтары ла була уларҙың, әммә йөрәктәренең миһырбанлылығы, күңелдәренең сафлығы, ихлас булыуҙары һәм иң мөһиме — сит балаларҙы үҙҙәренекеләй күреп ярата алыуҙары бар ҡаршылыҡтарҙы еңергә көс бирә. Рәшиҙә Йыһаннур ҡыҙы әйтеүенсә, ауылдаштары ла уларҙың был ҡыйыу аҙымын хуплай, туғандары ла бар яҡлап ярҙам итә. Әммә һәр ерҙә яман уйлы кешеләр ҙә юҡ түгел бит. Бәләкәйерәк саҡта ҡыҙҙарға “улар һеҙҙең атай-әсәйегеҙ түгел” тип әйтеүселәр ҙә осрай, мәктәптә тәүҙәрәк өлкән ҡыҙҙарын ҡыйырһытҡан осраҡтар була. Әсә кешегә, өй һайын йөрөп, балалар һәм уларҙың ата-әсәләре менән һөйләшергә лә тура килә.
Әле ҡыҙҙарҙың икеһе лә юғары белем ала, Альбина Башҡорт дәүләт университетының Сибай институтында уҡый, Алина — Башҡорт дәүләт аграр университетының беренсе курсында. Спорт менән ныҡлап шөғөлләнгән, уҡыу йортонда үткән барлыҡ сараларҙа әүҙем ҡатнашҡан Алина аш-һыу бешерергә лә оҫта. Альбинаның иһә тәүге һөнәре ашнаҡсы, әле технология факультетында был һөнәрҙең нескәлектәренә өйрәнә.
— Ҡыҙҙарыбыҙға ҡатын-ҡыҙға хас булған шөғөлдәрҙе өйрәтергә тырыштым, сөнки улар буласаҡ әсә кеше, киләсәктә үҙҙәрен яратҡан һәм хөрмәт иткән аҡыллы кейәүҙәр осраһын, — тип теләй Рәшиҙә ханым. – Балаларыбыҙ менән бәхетлебеҙ, улар беҙгә яҡын һәм ҡәҙерле.
Сафиуллиндар үҙҙәре тәрбиәләп үҫтергән балалар хаҡында шул тиклем ихласлыҡ менән һөйләүенән үк уларҙы яҡын итеүе, яратыуы күренеп тора. Ҡасандыр ата-әсә һөйөүенән мәхрүм булған сабыйҙарға ысын ата-әсә һөйөүенән дә ҡәҙерлерәк тағы нимә бар һуң?!