22 апрелдә бөтә донъя­ла “Парктар маршы” акцияһы башлана. Уны шулай уҡ Ҡурсаулыҡтар һәм милли парктар көнө тип тә атайҙар. Сара махсус һаҡланған тәбиғәт биләмәләре — ҡурсаулыҡтар, милли һәм тәбиғәт парктары, заказниктар һәм тәбиғәт ҡомартҡылары яҙмышына битараф ҡалмаған кешеләрҙе берләштерә. Акцияның төп маҡсаты — үҙенсәлекле тәбиғәт биләмәләре мәсьәләләренә халыҡтың иғтибарын йәлеп итеү.

“Парктар маршы” нигеҙендә республикала экология дәрестәре, фестивалдәр, ағас ултыртыу саралары, өмәләр ойошторола. “Асылыкүл”, “Ҡандракүл”, “Ирәмәл”, “Мораҙым” тарлауығы кеүек тәбиғәт парктарында “Үҙенсәлекле тәбиғәтте һаҡлап ҡалайыҡ” тип аталған ижади плакаттар конкурсы үткәрелә. Иң яҡшы эштәр Мәскәүҙәге Ҡырағай тәбиғәтте һаҡлау үҙәгенә ебәреләсәк.
2018 йыл Рәсәйҙә Ирекмәндәр йылы иғлан ителгәйне. Был хәл дә йәштәрҙе киләсәккә яҡшы нигеҙ һалыуға йәлеп итеү йәһәтенән өҫтәмә этәргес буласаҡ. Акцияның девизы – “Йәштәр һәм тәбиғәт — дөйөм киләсәгебеҙ”.