Өфө ҡалаһы хакимиәтендә баш ҡала мәғариф системаһының былтырғы эшмәкәрлегенә йомғаҡ яһалды.

Кәңәшмәне асып, Өфө ҡалаһы мэры Ирек Ялалов мәктәпкәсә белем биреү эшмәкәрле­генә, белем сифатын күтәреүгә, мәғариф учреждение­ларының матди-техник базаһын нығытыуға тейешле иғтибар бирелеүен билдәләне.
Былтыр баш ҡалала мәктәп­тәр төҙөү һәм төҙөкләндереү буйынса ла ҙур ғына эштәр баш­ҡарылған. Колгуев, Дим биҫтәлә­рендә, Нуғай ауылында заманса белем усаҡтары сафҡа ингән.
Ҡала хакимиәтенең мәғариф идаралығы начальнигы Елена Хаффазова йыл йомғаҡ­та­ры менән аныҡ һандар һәм миҫал­дар ярҙа­мында таныштыр­ҙы. Хәҙерге көндә мәктәпкәсә белем биреү учреждениеларына 252 балалар баҡсаһы, шул иҫәптән туғыҙ мәғариф үҙәген­дәге 46 мәктәпкәсә йәштәге балалар төркөмө инә.
Өфөлә 128 дөйөм белем биреү учрежде­ниеһы бар, шулар­ҙың 20-һе ЮНЕСКО ассо­циация­һы мәктәптәренә ҡарай. Мәктәп­тәр­ҙә йәмғеһе 113 мең бала уҡый.
Бөгөн уҡытыуҙы бер сменаға күсереү буйынса эш алып барыла. 2020 йылға мәктәп йәшен­дәге балаларҙың 17 меңгәсә күбә­йеүе күҙаллана, шулай булыу­ға ҡарамаҫтан, был мәсьәлә планға ярашлы хәл ителәсәк.