Башҡортостанда эш урынында имгәнеү осраҡтары кәмей. Тимәк, хеҙмәт шарттары ла яҡшыра төшкән. Был турала республика Хөкүмәтендәге кәңәш­мәлә әйтелде.


Хөкүмәт Премьер-министры урын­баҫары, Социаль-хеҙмәт мөнәсәбәт­тәрен көйләү буйынса өс яҡлы комис­сияның координаторы Салауат Сәғитов билдәләгәнсә, Профсоюздар федера­цияһы, эш биреүселәр берекмәләре һәм республика Хөкүмәте араһындағы 2017 – 2019 йылдарға төҙөлгән Өс яҡлы килешеүҙең быйылғы уҙған айҙар буйынса һөҙөмтәһе ҡәнәғәтләнерлек.
– Был осорҙағы берлектәге эшмә­кәрлектең йомғағы – социаль-иҡтисади күрһәткестәрҙең барыһының да тиерлек тотороҡланыуы, – тине Салауат Тәлғәт улы. – Алдыбыҙға ҡуйған төп бурыс республиканы үҫтереүгә, граждандар­ҙың хоҡуҡтары күҙәтелеүенә һәм халыҡтың көнитмешен яҡшыртыуға ҡайтып ҡала.
Предприятиеларҙағы хәүефһеҙлек талаптарының нисек күҙәтелеүе ту­раһында ултырышта ҡатнашыусыларға ғаилә, хеҙмәт һәм халыҡты социаль яҡлау министры Ленара Иванова һөйләне. Быйылғы тәүге һигеҙ айҙа Башҡортостанда етештереү урындарында имгәнеүҙәр аҙайған: ауыр тән йәрәхәте алған эшселәр һаны 27 про­центҡа, ә үлем менән тамамланған бәхетһеҙлек осраҡтары 5,5 процентҡа кәмегән.
Эшкәртеү предприятиелары, урман һәм ауыл хужалығы иң хәүефлеләре булыуын дауам итә. Шуға бәйле хеҙмәт хәүефһеҙлеген тикшереү буйынса методик ҡулланма ла әҙерләнгән, ул хеҙмәткәрҙең нисек эшләүен генә түгел, ә ниндәй шарттарҙа етештереүен дә анализлай. 2016 йылдың сентябренән бирле беҙҙең республикала ҡала һәм райондар ойошмаларының етәкселәре өсөн хеҙмәтте һаҡлау мәсьәләләре буйынса даими рәүештә зона семинар­ҙары үткәрелеп килә.
– Башҡортостандың бөтә башҡарма власть органдары һәм урындағы хаки­миәттәр йыл һайын 20 ноябргә саҡлы үҙ биләмәһендәге предприятиеларҙы тикшереү планын раҫларға тейеш. Асыҡланған етешһеҙлектәр тураһын­дағы мәғлүмәтте 15 көн эсендә Дәүләт хеҙмәт инспекцияһына ебәреү мотлаҡ, – тине вице-премьер.