Һаулыҡ һаҡлау өлкәһенә күҙәтеү буйынса федераль хеҙмәт (Росздравнадзор) мәғлүмәттәре буйынса, рәсәйлеләр йышыраҡ хоҡуҡтары боҙолоуына зарлана. Атап әйткәндә, медицина белгестәре бушлай дауалауҙан һәм операцияларҙы бушлай эшләүҙән баш тарта.

Тәүге ярты йыллыҡта мөрәжәғәттәрҙең 25 проценты ошо темаға ҡағылышлы булған. Былтырғы күрһәткестәр менән сағыштырғанда, был ике процентҡа күберәк.
Медицина ярҙамының сифатына ла дәғүәләр күп – мөрәжәғәттәрҙең 20 проценты. Был йәһәттән күрһәткестәр ҡырҡа үҙгәргән – былтыр сифатҡа респондент­тарҙың 54 проценты зарланған.
Шулай уҡ кешеләрҙе медицина персо­налының пациенттар менән насар мөғәмә­лә итеүе, льготалы дарыуҙар мәсьәләһе лә борсой.
Йыл һайын Росздравнадзор граждан­дар­ҙан төрлө мәсьәләләр буйынса 60 меңдән ашыу мөрәжәғәт ала. Кешеләр йышыраҡ акушер-гинекологтар­ға, педиатр­ҙарға, онкологтарға дәғүә белдерә.