Дөйөм Рәсәй халыҡ фронтының төбәк бүлексәһе ағзалары “Асылыкүл” тәбиғәт паркында экологик акция үткәрҙе.
Йәмәғәтселәр Рәсәйҙең Машиналар эшләү союзы вәкилдәре һәм Өлкәндәр университеты тыңлаусылары менән бергә һыу ятҡылығы биләмәһен сүп-сарҙан таҙартты.
— Асылыкүл — республика һәм күрше төбәктәр халҡының яратҡан ял итеү урыны, — тине халыҡ фронтының республикалағы “Генераль өмә” проекты координаторы Морат Шафиҡов. — Башҡортостандағы иң ҙур күлдән халыҡ йыл әйләнәһенә тиерлек өҙөлмәй. Ҡыҙғанысҡа ҡаршы, ял итеүселәр күбәйгән һайын сүп-сар өйөмдәре лә артҡандан-арта. Тәбиғәт паркы хеҙмәткәрҙәре биләмәне тәртиптә тоторға тырыша, өмәләр ойоштора. Әммә уларҙың ғына тырышлығы етмәй.
Йәмәғәтселәрҙең фекеренсә, хәлде тамырынан үҙгәртеү өсөн халыҡ араһында аңлатыу эше алып барырға, экологик мәҙәниәтте үҫтерергә кәрәк.