Заманса материалдарҙан төҙөлгән, зауыҡ менән биҙәлгән һәм бөтә көнкүреш уңайлыҡтары булған шәхси йорттар һуңғы сирек быуатта бар тарафтарҙағы ауылдарҙың һәм район үҙәктәренең күренешен танымаҫлыҡ итеп үҙгәртте. Мөмкинлектәре булғандар торлаҡтарын үҙҙәре өсөн бар яҡтан да ҡулайлы итеү өсөн күп тырышлыҡ һала. Көлөп-йылмайып торған шәхси йорттарҙа йәшәгәндәр араһында төрлө һөнәр һәм төрлө быуын вәкилдәре бар.
Бер-береһен Коми Республикаһының Усинск ҡалаһында табып, сәстәрен сәскә бәйләгән һәм артабанғы яҙмыштарын уртаҡ иткән Айгөл һәм Вячеслав Ғәмбәровтар ике улдары менән Краснокама районы үҙәге Николо-Березовка ауылында үҙҙәре һалып ингән күркәм йортта ғүмер итә. Нигеҙ ҡорғандан һуң биш йыл үтеүгә, өйҙәрен ҡала фатирына биргеһеҙ итеп өлгөрткән улар. Артабан мөһимлеге яғынан торлаҡтан ҡала икенсе урында булған еңел машиналары өсөн гараж йүнәткәндәр, быйыл иһә мунса бөтөрәләр. Йәшлектәрендә һайлаған һөнәрҙәре менән Ғәмбәровтар бар мәшәҡәтте еңел хәл итә.
Нефтекамала төҙөлөш техникумын һәм Ижевск ҡалаһында университет тамамлап, проект оҫтаханаһында эшләүсе Айгөл буласаҡ йорт архитектураһын, бүлмәләргә төрлө көнкүреш йыһаздарын урынлаштырыу дизайнын үҙе планлаштырған. Шундай уҡ махсус урта уҡыу йортонда электрик һөнәрен үҙләштереп, бөгөн төҙөлөш ойошмаһында хеҙмәт һалыусы Вячеслав ҡатынының уй-ниәттәрен тормошҡа ашырыуҙа бер ниндәй ҡыйынлыҡ та тоймай. Һөҙөмтәлә уларҙың йорттары тыштан да, эстән дә балҡып тора.
Ихатаға килеп инеү менән күҙҙең яуын алып ултырған тиҫтәгә яҡын төр сихри сәскәләр донъяһына сумаһың. Был ике уңғандың уртаҡ хәстәр емеше булһа ла, төп мәшәҡәттәр ҡатын-ҡыҙ иңенә төшә. Нисек кенә тиһәң дә, Ғәмбәровтарҙың ихатаһы – үҙ урамдарында ғына түгел, тотош ауыл буйынса иң матурҙарҙың береһе. Әйткәндәй, район үҙәгендә йыл һайын үткәрелгән сәскәләр конкурсында уҙған йыл улар өсөнсө урынға лайыҡ булған, ә икенсе урынды Айгөлдөң бер нисә өй аша ғына йәшәгән әсәһе яулаған.
Ишембай ҡалаһы составындағы Смаҡай ауылынан сыҡҡан Фирҙәүес Әнүәр ҡыҙы дүрт тиҫтә ярым йыл Кама буйында ғүмер кисерә, хеҙмәт стажы — 36 йыл. Ике ҡыҙ тәрбиәләп үҫтереп, бөгөн йәмәғәте, күп төрлө һөнәр оҫтаһы Жирдис ағай менән ейәндәр һөйөү шатлығын кисереп йәшәй. Өләсәйҙәре тәрбиәһе һөҙөмтәһендә ун етенсе йәше менән барған Булат та, 11 йәшен тултырған Тимур ҙа саф башҡортса аралаша, милли рух тойоп буй еткерә.