Башҡортостанда планлаштырылған һигеҙ шишмә урынына 11 шишмә биләмәһен төҙөкләндереү күҙаллана. Улар Күгәрсен районының Ураҡай, Салауат районының Мөрсәлим, Балтас районының Түбәнге Ҡарыш, Мишкәнең Яңы Сафар, Бәләбәйҙең Ермолкин, Ҡариҙелдең Абдулла, Тәтешленең Яңғыҙнарат, Әбйәлил районының Ҡырҙас, Краснокаманың Мүзәк, Баймаҡтың Түбәнге Иҙрис, Хәйбулла районының Воздвиженка ауылдарында урынлашҡан.
Биләмәләр “Башҡортостан Республикаһы экологияһы һәм тәбиғи ресурстары” дәүләт программаһына ярашлы төбәк ҡаҙнаһынан бүленгән аҡса иҫәбенә төҙөкләндерелә. Башҡортостандың Тәбиғәттән файҙаланыу һәм экология министрлығынан хәбәр итеүҙәренсә, ошо маҡсатҡа 1 миллион һумдан ашыу аҡса йүнәлтеләсәк.
– Финанслауҙы арттырыу һөҙөмтәһендә төҙөкләндереләсәк шишмәләр исемлеген киңәйтеү мөмкинлеге тыуҙы, – тине министрлыҡтың бүлек етәксеһе Эдуард Нагаев.
Әйткәндәй, һуңғы тиҫтә йылда Башҡортостанда етмешкә яҡын шишмәгә йән өрөлдө.