“Аллаһтың әжер-сауаптарына өмөт бағлап, Рамаҙан айында ураҙа тотҡан кешенең бөтә гонаһтары ғәфү ителер”, – тигән пәйғәмбәребеҙ Мөхәммәт ғәләйһис-сәләм. – Ураҙа кешене тәрбиә ҡыҫаһында тота, әҙәпкә өйрәтә”. Баш ҡалабыҙҙың “Родина” кинотеатрында Рамаҙан айының һуңғы көнөн оҙатыу кисәһе ошондай һүҙҙәр менән башланды.

– Ғүмеребеҙҙең матур миҙгелен үткәрҙек. Рамаҙан айында Аллаһ Тәғәләнең, ваҡыттың, ризыҡтың ҡә­ҙерен белергә өйрәндек, үлгән­дәрҙе иҫкә алдыҡ, сабырлыҡ һы­науын үттек, иманыбыҙҙы нығыт­тыҡ, күркәм әхлаҡ вә тәрбиә дә­рес­тәре алдыҡ. Атай-әсәйҙә­ре­беҙгә, олатай-өләсәйҙәребеҙгә, ба­ла-сағаларыбыҙға, күрше-кү­ләндәребеҙгә, яҡын ҡәрҙәш­тә­ре­беҙгә ҡәҙер-хөрмәт күрһәттек. Тот­ҡан ураҙаларыбыҙҙы, ҡылған изге ғәмәл-ғибәҙәттәребеҙҙе, бир­гән хәйер-саҙаҡаларыбыҙҙы Аллаһ Тәғәлә ҡабул итһә ине, иншаллаһ. Изге байрамыбыҙ һәр ғаиләгә шат­лыҡ һәм ҡыуаныстар алып килһен, – тине, байрам менән тәбрикләп, Башҡортостан мосолмандарының Диниә назараты рәйесе мөфтөй Нурмөхәмәт хәҙрәт Ниғмәтуллин.
Ураҙа тыныслыҡҡа, татыу­лыҡ­ҡа, үҙ-ара күркәм мөнәсәбәттә булырға әйҙәй. Исламдың биш те­рәгенең береһе ул. Ураҙа тотҡан­дар дөрөҫ йәшәү ҡанундарын өйрәнә.
Әйткәндәй, Рамаҙан айында дини саралар ойошторорға ярҙам итеү өсөн республикаға йыл һайын төрөк хафиздары килә. Быйыл да Башҡортостан мосолман­да­рының Диниә назараты Төркиәнән 20 ҡу­наҡты ҡаршы алды. Бер ай дауамында улар республика мәсет­тәрендә халыҡҡа иман таратты.
Әлеге сарала “Ҡөрьән Кәрим” сүрәләрен уҡыу, концерт номер­ҙары, әхлаҡ, тәрбиә тураһындағы ҡыҫҡа метражлы фильмдар ҙа халыҡтың күңеленә хуш килде. Кисә ифтар һәм аҡшам намаҙы менән тамамланды.