Башҡортостандың Дәүләт Йыйылышы – Ҡоролтай йортонда 43-сө ултырыш үтте. Көн ҡаҙағына 37 мәсьәлә ҡуйылған ине. Уларҙың 18-е республика закондарына ҡағылышлы булһа, 7-һе беренсе тапҡыр депутаттар иғтибарына тәҡдим ителде. Ултырыш Федераль һалым хеҙмәтенең Башҡортостан буйынса идаралығы етәксеһе Марат Вәхитовтың доклады менән башланды. Башҡортостанда былтыр 121 миллиард һумлыҡ һалым йыйылған. Уның күпселек өлөшө НДФЛ, килемдән һәм ойошмаларҙың мөлкәтенән алынған суммаға тура килә.
Ошо көндәрҙә республика Башлығы үҙенең указы менән Башҡортостан Үҙәк һайлау комиссияһының яңы составын раҫланы. Исемлектә Башҡортостан Республикаһы Үҙәк һайлау комиссияһының ғәмәлдәге рәйесе Хәйҙәр Вәлиев (Рәсәйҙең Үҙәк һайлау комиссияһы тәҡдим иткән), Марат Ғәҙелов (Кушнаренко районының муниципаль район советы тәҡдим иткән), Ләйсән Ғарипова (ЛДПР партияһы), Илдар Кәримов (Благовещен районының муниципаль район советы тәҡдим иткән), Геннадий Шабаев (“Рәсәй патриоттары” партияһы күрһәткән), Руслан Ямалетдинов (“Берҙәм Рәсәй” партияһы тәҡдим иткән) бар.
Дәүләт Йыйылышы – Ҡоролтай депутаттары ла Башҡортостан Үҙәк һайлау комиссияһының хәл иткес тауышҡа эйә алты ағзаһын һайланы.
Яңы состав Үҙәк һайлау комиссияһы вәкәләттәренең ваҡыты үтеүгә бәйле раҫланды.
Әйткәндәй, республика һайлау комиссияһы ағзаларының яртыһын — Дәүләт Йыйылышы – Ҡоролтай, икенсе яртыһын Башҡортостан Башлығы тәғәйенләй.
Ултырышта депутаттар 16 йәшкә тиклем никахҡа инеүҙе лә тыйҙы. Быға тиклем урындағы үҙидара органдары бындай никахтарҙы закон нигеҙендә теркәү хоҡуғына эйә ине. Ҡарар үҙ көсөн юғалтты.
Эльвира АЙЫТҠОЛОВА, Башҡортостандың Дәүләт Йыйылышы – Ҡоролтай депутаты:
– 30 ғинуарҙан республика Хөкүмәте башланғысы менән тәҡдим ителгән “Башҡортостан Республикаһында мәғариф тураһында” Башҡортостан Республикаһы Законына үҙгәрештәр индереү тураһында” 464-з һанлы республика Законы ҡабул ителгәйне. Был йәһәттән йән башына уртаса килеме йәшәү минимумының 1,5 күләменән артмаған ғаиләләрҙең генә компенсация алыу хоҡуғы һаҡлана ине. Закон проектын ҡабул иткәндән һуң, граждандарҙың мохтажлыҡтарын иҫәпкә алмай ғына барлыҡ категория граждандарына ла компенсация биреүҙе һорап халыҡтан күп кенә мөрәжәғәттәр килде. Республика Башлығы Рөстәм Хәмитов компенсацияны артабан түләү мөмкинлеген ҡарауҙы йөкмәтте. Республика Хөкүмәте тарафынан компенсация түләүҙе дауам итеү мөмкинлеген биреүсе килемдәрҙең өҫтәмә сығанаҡтары табылды.
Лилиә НУРЕТДИНОВА, Денис ҒИЛМАНОВ әҙерләне.