Силәбе өлкәһендәге “Рифей” комплексына Башҡортостан Башлығы Рөстәм Хәмитовтан “Бүләк” ҡушаматлы ат тапшырылды. Башҡорт аты “Аҡбуҙат” ипподромында уҙғарылған Халыҡтар дуҫлығы призына ярышта ла ҡатнашып өлгөргән.Ат спорты үҙәгендә республика етәкселегенә бүләк өсөн ҙур рәхмәт белдерҙеләр. Комплекс хеҙмәткәрҙәре әйтеүенсә, “Бүләк” тренерҙарға ла, балаларға ла бик оҡшаған. Тыныс холоҡло айғырҙы балаларҙы һыбай йөрөргә өйрәтеү өсөн файҙаланмаҡсылар.
Күптән түгел Рөстәм Хәмитов Силәбе өлкәһенә эш сәфәре барышында Кременкүл ҡасабаһындағы “Рифей” комплексында булғайны. Ул үҙәк хеҙмәткәрҙәре һәм тренерҙары менән аралашты, ат аҙбарҙарын ҡарап сыҡты. Төбәк Башлығы комплекста башҡорт аттарының етмәүен билдәләп, ошо мәсьәләне хәл итеүҙә булышлыҡ күрһәтергә вәғәҙә биргәйне. Бына хәҙер ул үтәлде. Комплексҡа “Бүләк”те Баймаҡ районы йылҡысылары тапшырҙы.