Башҡорт халҡы, һиңә бер һүҙ әйтәм, Минең әйткән һүҙҙе тыңлаһаң,
Зәки һеҙҙе һатҡан тигән һүҙгә
Ышанмаҫһың, алйот булмаһаң...
Уйыңа ла алма, башҡорт булһаң,
Әхмәтзәки беҙҙе һатыр тип!
Ҡөрьән үбеп Зәки ғәһед иткән,
Уйлай күрмә антын тапар тип.
Башҡорттағы намыҫ, иман менән
Ярһып тибә Зәки йөрәге,
Ҡолаҡ асма дошман ҡотҡоһона!
Зәки — Башҡортостан терәге…
1919 йыл… 25 март... “Башҡорт халҡына көйлө хитап”... Шәйехзада Бабичтың һуңғы шиғыры... Уның фажиғәле үлеменә ни бары өс көн ҡалған... Әлегә улар белмәй...
Һәм, ғөмүмән, Башҡортостандың киләсәге хаҡында ла, милләт яҙмышы тураһында ла бер нәмә лә белмәй... Бары уйҙарының аҡлығына һәм идеяларының хаҡлығына шикләнмәй...
“Башҡортостан” гәзитенең махсус проекты – фотосессия (Эдуард Дилмөхәмәтов фотолары): “Башҡорт халҡына көйлө хитап”... Был сараның үтә лә йөкмәткеле киләсәге бар. Хәйер, быныһы әлегә ижади сер булып ҡалһын...
Проектты тормошҡа ашырыуҙа ярҙам күрһәткәндәре өсөн “Любизар” 1-се башҡорт атлы полкы” хәрби-тарихи клубының идара рәйесе Илдар Шәйәхмәтовҡа (тарихи костюмдар, ҡорал макеттары) һәм Өфө дәүләт завод-атлыҡсаһы етәксеһе Рөстәм Сәйетовҡа (аттар, фотосессия өсөн биләмә) рәхмәтебеҙҙе белдерәбеҙ.