Былтыр Башҡортостандың Экология һәм тәбиғәттән файҙаланыу министрлығы дөйөм таралған файҙалы ҡаҙылмаларҙы законһыҙ сығарыуҙың 200-ҙән ашыу осрағын теркәгән.
Белорет, Учалы һәм Мәсетле райондарында ошо өлкәләге етешһеҙ­лектәр айырыуса күп. Дөйөм алғанда 11 миллион һумдан ашыу штраф һалынған, 23 мәсьәлә хоҡуҡ һаҡлау органдарына ебәрелгән, тағы ла өс ваҡиға буйынса енәйәт эше асылған.
– Рөхсәт ҡағыҙы булмай тороп, дөйөм таралған файҙалы ҡаҙылмалар сығарыу менән шөғөлләнгән өсөн юридик ойошмаларға 800 меңдән 1 миллион һумға тиклем штраф һалына, – тине экология һәм тәбиғәттән файҙаланыу министры урынбаҫары Филүс Яхин. – Бындай эштә иң мөһиме – енәйәтсене енәйәт ҡылған ерендә тотоу һәм теркәү, тейешле дәлилдәрҙе туплау.
Әйткәндәй, һуңғы йылдарҙа әүҙем ҡулланылған пилотһыҙ осоу аппараттары был йәһәттән инспекторҙарға ҙур ярҙам күрһәтә.